甚少到馬場的名人C到沙田馬場應酬，外望彭福公園環境，讚不絕口，跟住再往前看，睇到城門河河水，河邊有一排住宅大樓，名人C嘆一聲，見左丁山在旁，即刻問：「喂，對面河嘅住宅有無敵馬場景、河景、公園景，向河單位又可以望埋九肚山呢邊，正是有山有水，靚景也，呢個住宅叫做乜名？」左丁山笑曰：「不如你買幾間啦，為你個仔買定先都抵喎，三千幾至五千零蚊一呎之嘛。」名人C話：「唔係呀？咁靚景，呎價咁平？灣仔啲樓郁吓都萬萬聲一呎噃。」哎吔，為免佢過度興奮，即刻話俾佢聽，佢話好靚嘅住宅乃是華懋發展嘅，十幾年來，賣吓又唔賣吓，依家又賣吓，或者因為咁，所以樓價特別低一啲。名人C聽見話係華懋樓，就將話題轉向下一場買邊隻馬。
去年樓價話貴，搞到曾特首在宣讀施政報告之後一日，在三台聯播之中，畀市民打電話入嚟問樓市，幾乎問足一個鐘頭，令佢有啲難以招架。眨吓眼又過咗一年，十月十三日特首宣讀二○一○年施政報告，十月十四日朝早會上三台聯播節目，你估吓今年嘅聽眾會唔會又係集中於樓價/房地產呢？睇嚟幾難唔係，如果我係地產商，未來呢兩個星期最好唔宣傳甚麼單位以天價/亞洲最高價/世界最高價售出，大家識做，唔好令特首尷尬啦，賣樓不在一時啫，去年天匯之事，記憶猶新也。
講起賣樓，有一個新樓盤，位於九龍城沙浦道，樓盤名字係「御．豪門」，英文名字係BillionaireRoyale，真係夠威勢，如果有老友買咗嚟住，話畀我地聽佢住在BillionaireRoyale，我地可能會笑餐死，講畀外國朋友聽，佢地會以為香港滿街都係Billionaire㖭，淺水灣、山頂冇樓住，要住到九龍城。以前聽一位大地產商嘅營業部主管講，新樓盤名稱一定要豪，要嚟吸引內地大款，新發財，香港人如果睇唔順眼，對唔住，你地冇錢買嘅啫。呢位朋友，乃真正市場導向，我地港燦笑吓便是，即使有錢都無謂充炮艇，未夠十億元身家學乜人住在BillionaireRoyale呀，何況打工仔一族？