上市無老細撐場夠奇怪，但睇示範單位唔畀開窗就更奇怪！新地（016）近15年嚟最大型嘅洋房項目上水古洞天巒，以位於雙魚河畔做賣點，首批單位推出之後已經俾人預留晒。噚日首次開放現樓示範單位畀傳媒參觀，華華豈能執輸唔去現場欣賞雙魚河景致呢！
新地開放嘅係臨近雙魚河嘅兩間獨立屋，一間係豪裝示範單位，另一間係交樓標準單位（清水房是也），但係兩個單位嘅所有門窗都唔畀開，其中一間仲落埋磨紗玻璃門（圖），令華華完全無法參觀佔地3000幾呎嘅花園連泳池，同埋細賞無敵嘅雙魚河景觀！
到底點解唔畀開窗呢？新地解釋，因為花園仲有工程做緊，出面塵土飛揚，所以暫時唔開窗住喎！但係查實會唔會係怕大家聞到雙魚河嗰啲令人「心曠神怡」嘅味呢呵？
李華華