吸血鬼獵人 鞭鞭有力變戰神

吸血鬼獵人 鞭鞭有力變戰神

惡魔城都係橫向2D好!奈何遊戲壇由西人主導,首度高清示人嘅《Castlevania:LordsofShadow》亦焗住3D化;從大量巨型波士及主角條鎖鏈鞭嚟睇,風格極度有《GodofWar》感覺,不過男主角就無中年脫髮嘅煩惱!

文:阿洛

小島秀夫監修名牌

作為《惡魔城》Fans,之前受過陳年《惡魔城3D》嘅苦,見到都已經退後一步;再嚟見到設定主角唔係吸血鬼獵人貝爾蒙特家族後人,又退多步;而且,今次首先推出嘅係歐美版,Konami剛剛先喺東京遊戲展宣佈會好快推出日本版,相信遊玩意欲已經跌到冰點。
呢個時候,救世主出現喇,因為呢個遊戲係由小島秀夫領軍嘅Konami小島製作室作監修,西班牙MercurySteamEntertainment負責開發,信心返咗啲埋嚟,再睇埋極有惡魔城氣氛嘅畫面,又吊橋、又城門……算啦!同《WinningEleven》同一道理,信埋佢今次啦。

■班惡魔好搞笑,自己剝個頭落嚟,嘩!嚇死人咩!

■十字架可以變長鞭,保留番元祖《惡魔城》感覺。

■特典版有畫集、角色設定等,不過最重要係個封面有氣氛啲。

光明會聖騎士

今次新作以「末日」為背景,雖然係正統系列作,但就採用全新故事劇情,古仔係講地上聯盟同天界受到不明惡魔勢力「LordsofShadow」侵襲,而原本喺地獄嘅惡魔亡靈同時出現向人類作攻擊。
英雄嚟喇!佢叫Gabriel,有吸血鬼獵人血統,但唔係德古拉啲子孫,只係同吸血鬼獵人家族有關嘅組織「光明兄弟會」成員,作為聖騎士嘅佢,感應到已死妻子Marie嘅靈魂召喚,當上救世者角色,探究關鍵之物──神魔面具背後嘅真相。
而主角右手拎住可變鎖鏈鞭嘅十字架,左手則係鐵爪,可以擒城牆之外,仲可以配合使出連續技,呢個時候,又唔只似《GodofWar》,仲似埋《DevilMayCry4》㖭呀,抵玩啦喂!

■個人覺得敵人設定比較有心思,堪稱古靈精怪。

■令人懷念,一鞭即散骷髏怪。

■爬城牆,之前《惡魔城》都無呢招,叫做幾有新鮮感。

■巨型敵人角色,相當有逼力,亦好鬼《戰神》感覺。

■同《戰神》一樣,有時可以騎上啲怪物個頭。

主角得把聲

今次先推出歐美版,對本地Game迷嚟講仲方便咗,話晒英文都可以查字典,而且配音陣容強勁,有《迷幻列車》嘅RobertCarlyle、新版《StarTrek》艦長PatrickStewart,以及美劇《Californation》嘅NataschaMcElhone等。而剛公佈嘅日版聲優就有大塚明夫、藤原啟治、菊地由美、大塚芳忠等;想唔想等?自己決定。而遊戲更有分為特典版同普通版,最大分別係個封面,特典版型好多。

■留意左邊角色,似乎係同伴,但應該只係由電腦控制。

Profile

《Castlevania:LordsofShadow》
主機:XB360/PS3
類型:動作
廠商:Konami
人數:1人
發售日期:10月5日