亞視「2010亞洲小姐競選」決賽今年11月舉行，港澳賽區13名入圍佳麗噚日喺大埔見記者，各人喺台上自白1分鐘。被爆已婚嘅「臭口芭比」13號廖祉甯（Barbie）同35D巨咪孖女楊晴及楊晶齊齊入圍。
稱隨時心臟病發
臭口芭比早前被爆同31歲會計師ChenMin結婚，複試時唔見佢，但噚日宣佈入圍就現身，仲開口及着脷，自白大講伊索寓言：「故事話隻白兔驕傲自大，但冇唔啱，我覺得故事唔啱呢個時代，唔應該墨守成規。」事後佢接受訪問，自比白兔嘅臭口芭比猛話：「兔仔係驕傲自大，但同自戀差一線，我唔係驕傲自大，只係有少少自戀，至少差三線。」
臭口芭比否認覺得選美唔公平，仲賴記者：「點解你哋諗咁多，你哋對我有太多揣測。」佢解釋因病至甩底複試：「我突發性心臟病，唔信你哋去伊利沙伯醫院查吓。我唔激得o架，唔會笨豬跳，但可以玩海盜船。」既然有心臟病，頂得住選美刺激嗎？佢竟然話：「我係突發性心臟肌肉發炎，醫生話唔係咁易復發，但好多嘢冇預計。」輸咗會唔會激到暈？佢寸爆講：「如果標題寫好啲，我會冇事。」
講到婚書，臭口芭比竟然抵賴話同名同姓，又話：「私人嘢我唔回應，我會同公司交代。」至於半裸照就話係工作相，但經後期加工。
不過，亞視（製作）高級副總裁葉家寶就篤爆臭口芭比講大話：「廖祉甯同大會講登記婚書係真，但最後冇結婚；半裸照就係模特兒工作時被偷拍。」
若知道今屆入圍亞姐的底細，歡迎電郵至mailto:[email protected]報料。