俗語話一次係撞彩，第二次就係實力，我求大俠對今季歐洲4大聯賽嘅升班馬真係要畀隻手指公。上星期六西布朗先喺英超作客爆大冷贏咗阿仙奴，話口未完，星期日又輪到西甲嘅靴高斯發威，喺主場對住前列嘅西維爾，靠查斯古特梅開二度，淨勝對手兩粒。呢隻「神奇靴」之前已作客搞掂上屆冠軍巴塞，家輪到殿軍西維爾，亞軍皇馬同季軍華倫遲啲對住呢支強隊剋星，睇嚟都有排震！
查斯古特重振雄風
靴高斯以上季西乙亞軍嘅身份升班，西甲開季第一場就主場輸畀畢爾包0:1，外間都認為呢隊波唔夠班，今季到西甲一遊後下季返落乙組。點知球會喺轉會窗閂埋前，入到查斯古特同德倫特兩件好貨，教練域高砌吓砌吓，隊波開始見得人之餘，第2場聯賽仲要喺魯營靠突擊贏埋巴塞。
講起查斯古特，當求大俠聽到祖記放棄佢，堂堂世界盃兼歐國盃冠軍隊成員點都應該有意甲二線隊收留佢，竟然要淪落到加盟升班馬，真係戥佢可惜。但當求大俠睇到佢日前入完12碼跟住梅開二度後，肉緊到振臂高呼好似贏咗世界盃咁，就明白眾人皆醉佢獨醒，幫一隊升班馬喺西甲揚名立萬，總好過屈喺意甲得過且過。
西維爾吞兩蛋即換教練
老查呢兩腳除咗幫靴高斯以2勝1和2負得7分殺上第8之外，仲送咗西維爾教練艾華利斯一程，因為西維爾錄得呢場今季西甲首場輸波後，即時宣佈炒艾華利斯魷魚，球會仲搵咗舊年教馬略卡嘅文辛奴頂上，而艾華利斯亦係今季首位被開刀嘅西甲教頭，所以千祈唔好睇少呢隻「靴」嘅殺傷力。
其實今季嘅歐洲4大聯賽嘅升班馬真係唔講得笑，英超有西布朗坐上前6，意甲亦有隊切塞納排第10，之前贏過AC米蘭；德國嘅凱沙羅頓亦排第11，連拜仁都食過佢哋兩蛋。
話你知：靴高斯6季跳兩級
靴高斯位於華倫西亞自治區阿利坎特省首府城市阿利坎特，而當地是地中海其中一個重要港口。在1922年創會的靴高斯，對上一次在西甲角逐已經是96至97年球季。隊波於04至10年6季跳兩級，由西丙回升到今季西甲，更錄得開季第2場以2:0爆大冷擊敗巴塞隆拿，打破對方連續17場聯賽主場不敗之身。