代Cult1：80後摩登全家福　剪影生活

代Cult1：80後
摩登全家福　剪影生活

以前過年一家人才會着晒老西禮服、化行妝到照相館影全家福，搞到影張相好大陣仗。現時影張全家福就簡便得多，近年新興簡約自然風，純白背景再加自備心愛小道具以表現獨特的家族風格。摩登全家福，其實剪影了生活的一部份。

記者：林佩婷
攝影：陳盛臣、
部份相片由受訪者提供

見證生活的藝術品

香港人愛新奇，一般企定定影全家福已不能吸引他們。06年由英國引入的VentureStudio，就是以表現生活真實為主題的照相館。市場總監Winnie指和一般有齊佈置、道具的Studio不同，他們的Studio一律白色，沒有道具提供，全為了影個人及家庭故事：「英國情況跟香港差不多，舊式照相館式微，Venture的成立是希望為家庭建立獨有的Lifestyle故事。所以我哋背景只係單純白色，唔會提供道具，等客人自己拎鍾意嘅衣服、甚至狗仔寵物嚟，英國更有人帶埋牛、羊、蜥蜴等去影相。家庭成員方面，亦曾試過超過20人大家庭來影相，有些更特地從外國回來，淨係安排都用咗好多時間。我哋成個Idea係從相片認識到家庭故事，見證佢哋生活其中一部份。」最特別的是，影樓沒有套餐選擇，完成拍照後，會整成幻燈片讓客人揀相；之後店舖會將所有相片運回英國冲曬加工，然後按客人喜好及居所設計最合適的相框掛在家中，可謂一件生活藝術品。「運返英國做後期可以保證劃一質素，公司有超過30款設計，將相片連框架整好畀你放喺屋企。攝影師同客人交流其實已了解到佢哋嘅需要或風格，更有客人試過帶埋屋企相同室內設計師嚟。當然，由於香港客人經常問有無SoftCopy，最後我哋折衷咗新Item，就係將十多張相放入USB播番出嚟似Slideshow俾客人留念。」

■「宇宙最強」甄子丹亦曾和家人來拍照。

■Studio白色的油特地由英國運來，符合統一標準。

■客人來到Studio，頭5分鐘用來WarmUp。

■之後就利用對方帶來的不同道具拍攝，再按需要利用的燈光及音樂配合。

大人難搞過小朋友

雖然攝影時間約1小時，但攝影師Wilson話事前事後工夫有很多，「每當有家庭來拍照，我會提早幾日打電話同佢哋傾吓偈，了解對方背景，睇吓有無咩特別要求，跟住提議合適道具拎嚟影相。因為我哋強調各人可將鍾意的東西帶嚟同大家分享，能令相片更個人化同有趣。了解影相目的，自然有攝影方向，可以為客人製作難忘照片。好似有啲家庭帶蜥蜴、蛇、鸚鵡等嚟，將攝影棚變做亞馬遜，更有人拎架電單車入嚟，一坐上去好有自信，就感受到架車幾重要。影完後約7-10日執好相又請家庭返來揀相，最終拍板後再運去英國做後期。」好多人以為小朋友和動物最難搞，不過Wilson話未必，「小朋友嗰啲可以同父母配合，就算瞓緊、喊緊都可以照影，捕捉到表情。反而大人好多顧慮，有時仲難笑得好，周不時要叫佢哋自然啲。」當日Phoebe同Rex夫婦與子女拍攝，感覺成個過程好自然，「事前傾好晒拎啲咩，拍嗰陣好OK自然，囡囡見到個白色景仲好開心四圍走。」
Venture在英國有多間分店，香港是亞洲區第一站，Winnie指這裏華洋雜處，是亞洲之首，希望站穩腳再向周邊發展。她又指港人接受度高，開業一年已可開分店，「初頭做好多廣告，又擺展覽解釋我哋嘅攝影新概念。其實一張相勝千言萬語，再加上之後好多明星都有嚟影，自然吸引到有要求有質素的客人。最初外國人較多，家就約七成本地人。」

5.除了家庭照，有時會為獨個家庭成員特別設計畫面，就算BB瞓着亦可繼續影。

1.超搞嘢大家庭照，Wilson話有些80後唔鍾意影相，他要惡補iPad、卡通等知識和他們溝通。

2.有些80後夫婦無小朋友，會將寵物當家人帶來拍照。

3.Wilson話影相最緊要重質不重量，所以幾乎張張相都可以影到家庭成員笑容滿面。Phoebe和丈夫Rex異口同聲話玩得開心。

4.簡單的騎膊馬也可以好搞鬼。

■有些相會因應情況加上Graphic，好像相中人愛HipHop，就加效果營造氣氛。

■最後選約40張照片，7-10日後約家庭到放映室揀相，之後便運到英國做後期。

■6-8星期後做好的作品可作牆身擺設，同時可配合不同風格的家居設計製造。

■今年最新款的Mosaic，利用十幾幅圖案砌成一個故事。

Venture中環店：28856262

獨家代理Thomas場景

以火車Thomas為主角的系列一向受小朋友歡迎，但平常日用品或衣服的卡通見得多，想不到BabyDreamland07年就有獨家代理的Thomas&Friends場景作家庭照相之用。攝影師KK話當年代理主動搵他們，他還以為是惡作劇，「我成日同囝囝睇Thomas卡通，代理打嚟嗰陣我正同佢睇緊，最初以為呃人，後來傾落覺得OK，經過半年討論成功合作，成為世界第一間獨家有Thomas&Friends場景的攝影棚。」萬事起頭難，為了決定場景，單是卡通KK就看了約50次，火車等則要按比例搵廠做，足足搞了三個月。「家主要七個場景都係從卡通片搵返嚟，仲要搵啲景唔係得小朋友到此一遊，而係可以喺裏面行幾步都影到相。揀好晒畀室內設計朋友幫手變成草圖再跟住做，最困難就係比例，好似車唔可以細過小朋友。有啲道具好似DreamBedroom嘅床或畫架等道具香港搵唔到，就要特地從美國訂。背景則請代理畀高解像度相我整大做牆紙，方便設計前、中、後景更有立體感。雖然代理無講明衫都要着Thomas，但為貫徹主題，我又特地訂咗百幾件Thomas衫。相簿設計同樣有規定，整好仲要畀代理批先用得。」

■KK話Thomas場景好受歡迎，諗緊另租地方Set第二組景。

■場景後的大型Poster要問代理拎高解像度照片再放大，前面再擺道具使其更有立體感。

小朋友破壞力強

為了打響頭炮，開幕前KK招募小朋友做Model，影了一大批相作宣傳。再於當時荷花親子展覽推出，效果非常震撼。「為咗效果好，每日限定影三個客，暑假每個月約60個客，平時約30個。由於場景公仔比例較高，所以兩歲半以上至8歲才可影，事前會請父母同小朋友講明公仔較大，否則嚟到可能會驚。成個家庭來可能要等小朋友同公仔SayHi，摸吓塊面熟習吓，之後由佢哋玩，慢慢捕捉畫面。由於小朋友難控制，有時會搵嘢掟車仔或吐口水，損耗大要成日維修。為咗令BB都可以同Thomas影相，我哋又利用白底加有關玩具、車仔畀兩歲半以下BB和父母影相，造成NurseryThomas，連相簿Logo都要重新設計，感覺BBFeel多啲。」

■媽咪Ada話這裏好有實景感，而且空間大感覺好舒服。

■最受歡迎的場景就是月台位置。

■景內擺設都由美國訂回來裝飾。

■其中一個是直升機Harold場景。

■特地為BB設計NurseryThomas影相服務，着埋蛤乸衣更Cute。

■NurseryThomas相簿Layout特別有BBFeel。

■以前流行大型相簿，近年父母喜歡細細本。

網址： http://www.babydreamland.com