出發往土耳其前，很多朋友提出要求「記住要買手信返嚟！」相信買手信係港人的習慣，泰國買榴槤糖、台灣買鳳梨酥，咁土耳其買咩？伊斯坦堡歷史悠久的大市集，不單止特產多，導遊仲話有得講價！
記者：蕭漢祥
攝影：譚盈傑
鳴謝：土耳其航空、GRSCorporationLtd、TempestTour
土產蜜糖「NoDiscount」
無論是香料還是糖果，我都相信不太適合香港人口味，更不適合作為手信，因為兩者的味道均是較濃和奇特。唯獨是其中一樣特產，即使是又濃又甜，應該都會大受歡迎，這就是蜜糖。土耳其境內山脈多，很多養蜂場建設於山上，就因為山上鮮花的品種多，所以土耳其蜜糖以夠wild夠天然聞名於世。
店員一般都會介紹一小瓶的蜜糖漿，1公斤價錢約$154，但自從飛機禁止攜帶液體入機艙之後，一大塊的蜂巢就成為旅客首選，起碼放入行李唔怕打爛，一盒約$257。同樣小記都發揮講價本色，但店員簡單直接回應：「Nodiscount!」
濕星筍貨遺珠
行咗咁耐，除咗土耳其糖果講到價之外，其餘真係無咩着數。相信讀者們跟小記一樣，都想知有甚麼是抵買貨品，唔通導遊欺騙我？其實唔係無，但一般都是濕碎的貨品，例如富有土耳其特色、非常色彩繽紛的燈罩，即使無講價都只是$51。
至於在土耳其每一餐飯之後，都會悠閒地飲番杯的土耳其黑茶（TurkishBlackTea），最便宜的一種約$30.7，經過1分鐘游說後，店員以唔好阻住佢做大生意的態度，微微減至$28.2成交，平得$2.5把鬼咩！其實大市集間間店都無咩點減價，原因真係生意多到唔憂做，少少減價純粹促銷，減得多都費事睬你。
甜到漏糖果有價講
講歷史，建於1461年的大市集（當年是小市集），經過災害、重修及擴建之後，據估計室內及室外加起來現時約有5,000家商店。店舖多成咁都可以「為到皮」，原因係呢度賣得貴兼向來專做遊客生意，每小時一批又一批的國際性水魚衝進市集內購物，可以大膽講句：相信大市集係世界各地公認的土耳其手信街。不過導遊特別跟我們說，這裏的貨品不單止貴，有些更不會標價，讓遊客自己議價，執唔執到平貨就靠你自己。
售貨員一般都懂得多國語言的問候語，一見你係亞洲人，就用盡日文、韓文、普通話同你打招呼，如果唔想理佢大可以講廣東話扮唔明。而售賣貨品的種類多不勝數，最多就是糖果香料，其次是杯碟及飾物，係咪每種貨品都有議價能力，當然要測試吓，首先從糖果入手。入門口無耐就有一檔掛滿老闆與老外明星合照的相片，老闆好風騷咁站在門外，一講價店員已經唔多理睬，將小記轉介畀隔籬間糖果舖，糖果種類包括朱古力、椰子、綠茶等，味道非常甜，通常都唔啱香港人口味，不過價錢一啲都唔平，一公斤就要$205.6至$257左右，小記花了近10分鐘講價先平到$25，OK啦。
KapaliCarsi（大市集）
地址：由Camberlitas車站步行5分鐘
咖啡一口價兩秒成交
除了有蓋的大市集，其實旁邊戶外地方亦是市集範圍，外面售賣的商品通常都是玉石銀器、杯碟、玩具等。就以專用來飲用土耳其茶的杯為例，一套六隻盛惠$61.5，當議價時老闆就會搵另一Set較平的款式給你，即是無價講！
不過，在大市集外還有另一間店舖，即使大家都知道是無價講，但依然大排長龍，就是一家專賣咖啡的KurukahveciMehmetEfediManhdumlari。無得講價皆因咖啡質素好，咖啡味濃，包裝由$5.1/50克，到$102.6/1000克不等。購買時只須跟店員說要哪一個價錢，他便左手收錢右手交貨，交易過程不需兩秒。
即使咖啡店門外大排長龍，但每宗交易過程不足兩秒，根本無時間俾你講價。約$5.1/50克至$102.6/1,000克。
土國不土潮物手信
對於潮人來說，相信大市集的貨色絕對未能勾起物慾，但在土國有沒有潮物店？雖則伊斯蘭教思想保守，但並不等於當地人無創意。在Addresistanbul這商場就雲集土國設計界高手，當中的maybeshop超過九成的貨品，就係出自呢班本地設計師手筆。除了創意無限之外，不少貨品都融入環保元素，好似酒樽形水杯就係以用完的啤酒樽切割而成。
除了小飾物擺設之外，還有令人聯想起星爺電影國產零零漆的「篋神」，不過土國設計師就將「篋神」變為座椅及卧床，唔知設計概念係咪源自星爺？但肯定就知道價錢唔平，一張座椅近$8,000，而且張凳仲唔識變番做行李形狀，運返香港有難度。
maybeshop
地址：addresistanbulevdekorasyonmerkezi,no127,HalideEdipAdivarBulvari,Sisli
網址： http://www.maybedesign.at/
TurkeySouvenir
溫馨提示：去伊斯坦堡掃貨，真的有很多特色貨品如水煙、燈飾等。但購買時最擔憂是貨品太大件，上飛機易超重。其實土耳其航空的經濟客位，每位乘客都有30kg的行李重量，比其他公司為高，無咁易超重。
TravelMemo
持特區護照免簽證，持BNO須簽證。土耳其領事館：25721331
土耳其伊斯坦堡來回機票$6,290起（未計稅項）。土耳其航空電話：28613111
1土耳其新里拉兌5.14港元（文中已折算港元）
240V，兩圓腳插座
土耳其
伊斯坦堡
下周間中有陽光19-25℃
