無綫藝員司徒瑞祈（阿水）去年疑誤墮騙局而欠下80萬賭債，件事都搞到阿水好鬼麻煩，不過家阿水就專注工作，早前仲考獲游泳教練資格，生活都好正常，不過噚日馮仁昭喺香港討論區上見到阿水忽然成為熱爆人物，原來有網民轉載一個blog，個blog入面就驚見有三張阿水同一個男仔嘅親密合照，有一張仲係疑似錫錫相，雖然阿水個樣就起晒格，但都睇到佢好享受咁款，由於阿水自出道以嚟都唔多緋聞，所以就令人揣測佢嘅性取向。
「下次玩保守啲」
噚日馮仁昭聯絡到阿水，佢聽完後話只係得啖笑，佢解釋相入面嘅男仔係佢大學同學嘅朋友，去年先喺朋友嘅生日會上認識，之後就只會喺msn先會聯絡吓。
阿水話成班人玩遊戲時影相好正常，只係啲人專登cut咗身邊其他人，佢自己都估唔到一張相就會搞到咁大件事，阿水話自己放喺facebook上嘅相一向都好正常同健康，但今次之後下次玩遊戲時再影相就會叫朋友唔好放上網，或者玩得保守啲。
自言拍過幾次拖
阿水話雖然佢家冇拖拍，但就絕對鍾意女人，佢話：「自己係鍾意女人，都拍過幾次拖。家自己放多咗時間喺工作度，只係覺得自己本身對朋友可以玩得好放同投入，但係如果連呢啲咁少時間都冇，就好慘，希望有多啲空間。」
