食環署六四前強搶新民主女神像，警方7月先至要求支聯會四名常委同九名義工去北角警署報到，話律政司未決定係咪要告支聯會成員。
支記成員、義工噚日再去差館報到，點知警方又再照辦煮碗，搞完一輪手續，仍然話律政司未決定到係唔係要起訴各人。一班支記常委不滿警方拖足四個月未有發落，每次報到都花半日時間，發晒火話唔會再報到，如果警方要拉人，直接出拘捕令啦。警方今次好識做，不要求眾人續保，隨即回水發還每人100元保釋金。據講警員透露律政司11月應該有定奪，支記成員不樂觀，事關7月報到時，差佬話9月有分曉，事實證明冇咁嘅事。