暑假過後，啲機票、旅行團、自由行套餐都減價，又係平價旅遊嘅時候。但係有乜地方好去？泰國亂局初定，唔係好想去；菲律賓魔警殺港人，小妹都唔會再去；日本原本都幾好，最近中日就釣魚台鬧到好僵，風頭火勢梗係去唔過。左揀右揀，都係台灣最好。
長榮仲送三大禮
長榮假期啱啱推出嘅三日兩夜機票加酒店連早餐套餐，減價一成賣$2,090起，都幾抵玩。長榮航空客運課老友Wendy話，呢個package仲送出三大禮遇，包括優先處理寄艙行李安排，額外10公斤免費託運行李，出發時可以喺商務艙櫃台辦登機手續。長榮仲額外送出禮物包，內有台北乘車悠遊卡（類似香港八達通）同食店折扣券。旅客11月6日至出年4月25日期間出發，再獲贈一張台北國際花卉博覽會門票。詳情瀏覽 http://www.evaair.com。
台灣觀光協會香港辦事處都有嘢送，辦事處老友Fiona同小妹講，協會家推秋季推廣優惠，港澳居民買咗台灣自由行套餐，可以憑機票（中華航空同華信航空除外）去協會上環辦事處攞一張換領券，憑券即日起到出年1月15日，喺桃園同高雄國際機場嘅昇恒昌免稅店換取農產品禮品一份。查詢電話25810933。
唔想動腦筋plan行程，參加旅行團都有優惠；永安旅遊慶祝46周年東南亞團團費減價46%，好似台中四天團，原價$3,399，優惠價$1,835，玩四日唔使二千蚊，都算係咁。
電郵：mailto:[email protected]