諾貝爾物理學獎得主「光纖之父」高錕做過中文大學校長九年，高錕更將珍貴嘅諾貝爾獎牌捐畀中大展覽，中大為感謝呢位前校長嘅貢獻，決定喺校園豎立高錕像，高錕夫婦更會出席今日嘅揭幕儀式。
高錕太太黃美芸噚日接受港台節目《舊日的足跡》訪問，話佢對銅像嘅設計冇乜意見，只係提出希望個銅像造型自然啲，「唔好企得太直」，同埋最好「單手插褲袋」，「因為咁會有型啲」。
肥咗幾磅
高太又話，高錕做中大校長嘅九年期間好大壓力，懷疑丈夫可能因為咁影響個腦，後來得病。佢透露，由於藥費昂貴，高錕今年3月由香港返美國後，曾經停止服藥4、5個月，結果病情變差，家已恢復食藥，病情穩定番，而且胃口好好，肥咗幾磅㖭。
高錕夫婦今次返港除咗成立高錕慈善基金會外，另一重頭戲係下月23日高錕領大紫荊勳章，不過高錕自己仲未知，高太話到時先話畀佢知。啱啱過去嘅呢個月19日又係佢哋夫婦結婚51周年，亦係佢哋寶貝女生日，以往多數顧住同個女慶祝，反而冇慶祝結婚紀念，今年咁啱喺香港，親友送咗個芝士蛋糕畀佢哋，佢哋就食cake慶祝。