舊年9月26日，一班80後band友走去民建聯嘅「紅色搖滾音樂會」向表演者夏韶聲示威，高呼「平反六四」，更加展示咗「搖滾不容殺人政權」嘅橫額抗議。
一年過後，呢班後生仔延續呢份抗爭情懷，噚日喺立法會門外，搞咗個「搖滾不容殺人政權61周年音樂會」，由下午4點唱到晚上9點，由郭達年、黃衍仁、crazylion等音樂人、樂隊，唱出佢哋對中共建政61周年、對香港社會嘅睇法。
佢哋話，中共根本就唔尊重搖滾樂，曾經有音樂單位被列入黑名單，被拒入境，亦有音樂單位要杯葛中共漠視生命、踐踏人權，因而拒絕踏足中國。班80後一路聽歌一路搖動身體，有人講笑話，要「搖」到共產政權「滾」出中國。