花旗股市上禮拜五大幅上升，道指升幅接近200點，報收10860，直逼11000關。開市不久道指已升超過190點，隨後一直橫行至收市，挾淡倉味道非常濃厚，但係好似早幾日咁講，花旗股市炒上嘅勢好明顯，應會好快試11000關。
港股上禮拜雖然只升148點，但係50日線升破250日線，強勢進一步鞏固，今日挾花旗股市嘅升勢，應該可以升破22300。
平保C輪17874：平安保險（2318）上日報收75.45元，升1.4%。股價9月初到家一直沿住10日線推高，技術走勢越嚟越靚，短線有機會上試81元，破位之後睇85元，可以諗吓隻C輪17874。
隻輪現價7.8仙，2011年3月30日到期，行使價75元，溢價9.7%，引伸波幅34.8%，槓桿率9.7倍（有效5.4倍），正股升上85元，17874睇升上14仙，升幅差唔多係8成，正股跌穿72元嘅話就沽咗隻輪。
俊樺