本周新返嘅《叛諜追擊》，表面上睇係鎮壓伊拉克叛亂，整頓當地治安，實情背後陰謀多多，Bonus仲收錄由美軍扮演臨記嘅獨家訪問，以及有關諜戰內幕！究竟美軍進佔伊拉克，係想幫人重掌政權，抑或另有目的？想知道真相，最好煲晒成隻碟連特別收錄內容，咁咪一清二楚囉！
記者：陳國輝
布殊玩自己友
老實講，美國前總統小布殊有乜建樹，各位有數得計。電影內容取自美國戰地記者著作《ImperialLifeintheEmeraldCity》，但有幾多成係寫實，幾多成係老作，咁就要慢慢欣賞先知喇！說穿了，成套戲明寸美國，話就話幫伊拉克人重掌政權，但同時又不斷搵藉口，要求美軍駐守，甚至連一級准尉米勒（麥迪文飾演）亦一直被蒙在鼓裏，有家歸不得！
論娛樂性，大家最想睇嘅一定係試機位，例如大爆炸或者槍戰聲等，但成套戲114分鐘內，吹水位幾乎佔七八成時間，如果你只想深入了解美軍進駐伊拉克嘅背後原因，《叛》啱晒你，至於你話想佢好似《DieHard》咁炸足120分鐘，就絕無可能喇！
暗殺多過明槍
可能你會諗，無爆炸場面？咁點算戰爭片呀！無錯，《叛》只係以戰爭劇情反映美國政府嘅背後陰謀，但講到槍戰位其實都有，最精采可能喺頭15分鐘，呢一幕由麥迪文帶住成班美軍，同伊拉克軍隊駁火，除咗槍戰之外仲有爆破場面㖭！但後期多數以文戲交代，反而恐怖分子嘅暗殺場面比較多，想用嚟試聲，呢隻碟未必咁適合。
值得一提係，當劇情進入戰爭狀態時，鏡頭會搖晃不定，實戰感覺勁好Feel。但以畫質嚟講，《叛》有唔少場面都喺黑夜拍攝，Noise極之嚴重，但諗深一層，呢啲會唔會係導演刻意營造嘅真實效果？大家睇嘅時候，不妨多加留意。
睇美軍喪爆行為
類型：戰爭片
畫面：2.4比1
音效：DolbyTrueHD5.1、DTS-HDMasterAudio5.1
特別收錄：美軍專訪、重建巴格達戰場、麥迪文戰地傳真、追擊諜戰內幕、刪剪片段、導演及演員旁白解說
查詢：DVDPro（23326326）
