引子
幾年前看雜誌的巴黎街頭時裝snapshots，某人身上的slogantee教我喜歡到不得了：「Everythingyoulike,Iliked5yearsago」那個like之後的「d」是重點，知你英文好，但純粹為口腔快感，都想譯多次廣東話：「你家鍾意嘅所有嘢，我5年前都已經鍾意完Lu！」冇錯，那個「d」字就係個畫龍點睛嘅「Lu」或者「啦」，招積到呢！
這句話自此我當然長期袋住喺袋，因為在不少情況下，它的確好好用好有用！例如，um，在一些抄了你或執了你口水尾也不知（或知）還在你面前認叻的人身上。
同時，這句話也啟發了我一種「為5年後Shopping」的「逆向思考」。
也即是今日我要同大家分享的理論。
開講
起因是我去柴灣的Undercover買了盞蘋果燈，朋友說「喂，同你間屋唔襯喎！」
「冇計啦，因為我買了一幅畫，畫裏面剛好正是這支燈，便讓它們團圓吧。」我答。
相熟店員：「你最近打算搬屋嗎？」
「相反呀！還有好幾年才約滿呀！但差不多搬時才找傢俬買一定找不到合心水的呀，一定要5年前便想好下一間屋的主題，並開始逐一搜購呀！你買西裝也要平時逛街見到買定吧？臨急臨忙才去找一定買不到心水的，不是嗎……」
一講到買衫，我便發現自己停不了，還信口開出了幾套「為5年後Shopping」的怪論，漸漸我竟發現左右隔鄰的路人們都開始靠近圍攏在聽，我便知道，應該將它們抄下，獻給我親愛的讀者們。
以後你若買了嘢而你老公/老婆/老竇/老母/老友竟阻頭阻勢問你「呢個你買嚟做乜？」以下各款請隨便揀個，唔使客氣！
學斯洛伐克文論
這是一切招式的基本步。
第一個你最常遇到的問題一定是：「呢個你買嚟做乜？」
買嚟做乜？我點知呀？係咪樣樣嘢都事必要知道「做乜」先買得？一個聖鬥士星矢嘅心口針、一副毛冷織嘅太陽眼鏡、一對泥黃色嘅喱士高踭鞋究竟買嚟做乜？我好可能兩年半後先知，到我有朝早襯襯吓衫對住塊鏡望住自己覺得硬係爭咁樣嘢先知佢「買嚟做乜」！
但請問，如果我家唔買咗佢先，到時蹺起手我又搵唔搵得番佢嚟買先？
即係咁講，今日下晝同你去銀行攞錢嗰陣，突然有批講嘢嘰喱咕嚕嘅西人揸住AK47入嚟打劫，你畀晒啲錢佢佢都硬係要捉住你做人質，全靠我同佢講你仔細老婆嫩佢哋先放過你，咁到時你又會唔會好後悔笑我學「斯洛伐克話」笑足3年？
當然在中環遇到來自Slovakia的悍匪機會率是多少大家心中有數，但萬一遇到了，而你又能適時使出了相應的絕招，那不但是一個全場鼓掌位，分分鐘是一個上到A1頭條救命位啦！
買多個Prada手袋又不是買不起又不是學「斯洛伐克話」咁大陣仗，你為乜要問我「買嚟做乜」啫？買嚟做乜？第日你咪知囉！
Johnny事務所論
打蛇隨棍上的第二個問題：「咁即係會有好多買錯唔用啦，咁你話你係咪嘥錢吖？」Ofcourse！但有可能唔嘥咩？幾成功嘅企業都冇可能做到100%賺錢咕喎，比較叻啲嘅，咪最多將蝕錢比率盡量減低啲囉，更何況我啲講緊嘅係藝術，冇得咁計啫！
例如話，例如話呀吓，聽講日本啲藝能事務所，即係經理人公司啦，都係一簽簽幾百個artist返嚟，每人每月只提供基本可恥月薪，便由得他們「跑馬仔」，到最終可能只跑出阿木村同大口仔幾個，但賺到的錢便要養全Johnny事務所不知名藝人共幾百名，所以SMAP要紅了很久之後才真正有人工加……
總之，係呀，幾叻嘅電台電視台經理人公司artdealer都會有買錯artist唔用嘅時候o架！阿一鮑魚亦估唔到今日會啱啱好有17個客嚟食四頭鮑而啱啱好煮定17隻一隻都唔嘥o架！
所以你見過有到季尾買衫褲鞋襪首飾手袋買到啱啱好一件都冇多嘅「時裝精」未呢？我就未見過喇！
珍寶倉論
連消帶打第三條：「咁屋企邊有碇躉呀？真係要租迷你倉o架啦！」
咁又唔使！事實上迷你倉亦唔夠大，亦唔係最好選擇。因為一切嘢裝咗入箱逼埋一嚿仲送咗入元朗，你就唔會咁神心為咗搵番隻耳環專登揸九個字車入去o架喇。
所以我的方案是（我未做，但打算做）：不要迷你倉，不如珍寶倉，如果家裏真的已逼爆，一定要使點錢，不如在工業區租個小單位，當是studio也好，office也好，私人hea竇也好，總之找多個理由讓自己上去（因為純上去摷嘢你一定不會成日上），而且你的「存貨」又不用裝箱（一裝了箱，信我，就深似海，你就永遠不會想再拆，等於丟了），display得好好哋，你會比較有心情將你5年前買落的舊衫舊傢俬在適當時候攞出嚟，完成我們這個「為5年後Shopping」計劃的最重要一步！
順便塞實埋佢哋把口囉！
（所以用今日此理論者，一定要好記性，得閒要着下5年前買落的新衫出來耀武揚威，否則「佢哋」便有位入o架喇！）
本欄逢星期日刊出
Textby黃偉文
mailto:[email protected]
微博 http://t.sina.com.cn/wymanwong
