黎耀祥和鄧萃雯接連演出《巾幗梟雄》和續集《義海豪情》，螢幕情侶形象深入人心。不過，今年12月，柴九黎耀祥將棄舊愛迎新歡，首度夥拍近日憑《公主嫁到》人氣勁升的佘詩曼演出新劇《法證先鋒III》，奉旨跟阿佘查案談情。當視帝遇上視后，肯定擦出火花。為襯得起靚女級的阿佘，祥仔要進行地獄式減肥，以型男狀態出現。
近日再憑《公主嫁到》人氣勁升的佘詩曼，入行十多年來，先後與不下數十位型男小生合作拍劇，如羅嘉良、陳豪、鄭嘉穎、黃子華、林峯、馬德鐘和張智霖等，近年阿佘的拍檔不是陳豪便是馬德鐘和鄭嘉穎，雖然她與陳豪主演的《公主嫁到》贏盡口碑和收視，但二人的合作，無疑欠缺了新鮮感。不過，阿佘今年12月接演梅小青監製的《法證先鋒III》，肯定會一新觀眾耳目，因為她將首次夥拍實力派的黎耀祥演出，當視后遇上視帝，肯定好戲連場。
首輯吸264萬觀眾
06年由歐陽震華和林文龍孭飛的《法證先鋒》，播映大結局時平均收視高達41點（約264萬觀眾收看），無綫遂開拍第二輯，並加入飾演MadamMa的阿佘和鄭嘉穎，同樣大收旺場，而當年阿佘與鄭嘉穎更是因為合作該劇而擦出愛火花。不過，無綫今次開拍第三輯，男主角卻由原來的歐陽震華變成黎耀祥。
記者昨日致電監製梅小青，她說：「《法證先鋒III》會喺12月開，有黎耀祥、阿佘、徐子珊同吳卓羲。因為幾位主角第一、二輯嘅感情線已經寫到差唔多，好難再寫落去，而且有好多好優秀嘅演員喺第一、二輯故事中又死咗，希望第三輯可以畀佢哋翻生，所以今次會係一個全新嘅故事人物配搭，全新角色。」
阿佘飾演法醫官
梅小青續說：「阿佘今次唔係做madam，而係飾演法醫官，祥仔就會做一個好型嘅警察，同阿佘一齊拍檔查案，咁當然佢兩個會有唔少感情戲啦。由於阿佘同祥仔從未試過合作，所以對觀眾嚟講應該好有新鮮感。」
祥仔昨日談到跟阿佘合作拍劇極為興奮，他在電話中說：「老實講，自己拍咗咁多年劇，幾乎每一個花旦都拍過，但偏偏未拍過阿佘，就算同劇冇對手戲嘅都未試過，所以今次覺得都好新鮮，我啲拍檔越嚟越後生。我覺得阿佘好聰明、好靈活，近年演技明顯進步同成熟咗好多，所以我好期待今次同阿佘合作。」
祥仔減肥扮型警
祥仔表示由於他在劇中飾演有型的警察，為襯得起靚女阿佘，他誓要進行地獄式減肥，他說：「我家145磅，希望開劇之前可以減到10磅、8磅啦，瘦啲型啲先至襯得起阿佘吖嘛！」
至於阿佘對跟祥仔合作也相當期待，昨日她在電話中說：「唔知係咪落實咗，如果係嘅話，絕對係一件好事，因為我未試過同祥仔合作，佢係好戲之人，佢做《巾幗梟雄》我都有睇。」
採訪：林妃
話你知：無綫劇添食最耍家
無綫凡有劇集收視理想，例必原班人馬拍續集再戰，直至劇集拍到爛才收手。要數續集劇始祖，相信是劉松仁於76年拍攝的《陸小鳳》。
《陸小鳳》（76年）
古龍的經典武俠小說，由劉松仁扮演行俠仗義的陸小鳳，之後連續兩年推出《陸小鳳之決戰前後》（圖）及《陸小鳳之武當之戰》。
《上海灘》（80年）
講述上海的幫會情仇，周潤發和趙雅芝飾演的許文強和馮程程成為經典角色，劇集同年添食拍攝《上海灘續集》及《上海灘龍虎鬥》。
《新紮師兄》（84年）
故事圍繞幾位少年警察的成長經歷，梁朝偉、張曼玉、劉嘉玲和劉青雲的演出深入民心，續集及第三輯於85年及87年推出。
《壹號皇庭》（92年）
以法庭故事為藍本，劇集於92年至97年間，共推出五輯，就算女主角陳秀雯過檔亞視，無綫照拍可也。
《刑事偵緝檔案》（95年）
顧名思義，劇集圍繞刑事案件，首三輯由陶大宇和郭可盈孭飛，收視爆燈，「張大勇」陶大宇更贏得「師奶殺手」稱號。
《妙手仁心》（98年）
雖被指喪抄外國劇《仁心仁術》（ER），兼經常見醫生蛇王happyhour，但此劇已成為經典中的經典，也因此在深宵時段重播又重播。
