自從解散殖民地時代嘅政治部之後，好多人以為香港已經冇咗呢種迫害忠良「東廠」組織，原來有啲部門只係冇其名，卻有其實，食環署疑被借屍還魂，前有沒收新民主女神像，復登上保釣二號查老鼠，羅織無厘頭罪名打壓民間組織。
最新被特區「東廠」針對嘅係幾年前被冠以「新民主女神」嘅譚香文。佢上周末喺自己地頭星河明居外空地搞中秋晚會，晚會前忽然獲食環署「溫韾提示」，指晚會有唱歌、魔術表演，提供娛樂節目，所以要申請娛樂牌照。
搞街坊活動都要攞牌
由於攞牌要個半月前申請，要攞正牌無疑逼佢取消活動，譚香文認為晚會只係街坊活動，覺得毋須攞牌，結果晚會當晚，食環署派員到場監視。事隔幾日，佢收到風食環署正諮詢法律意見，隨時告佢。譚香文稱中秋節前後，唔少居民組織都有搞同類型晚會，唔係通通領有娛樂牌照，如果食環署作出檢控，應該一視同仁；佢又指當晚佢自己上台唱歌，冇伴奏兼走音，理論上冇可能係「娛樂」，若然被起訴，一定抗辯到底！