保釣義士兩度起錨，可是連續兩日被特區阻撓，未駛出公海就被迫回航，《基本法》話香港人有出入境自由，原來無釣魚自由，八方強烈要求特區政府提交人大釋法，保障特區人民釣魚權。
特區可有擦錯鞋
保釣二號出師未捷錢先使，據講喺維港同橫瀾島一帶「遊船河」兩日，被海事處招呼「傾吓閒偈」，開支都唔嘢小，船主羅就透露，啟航前買咗120桶燃油，每桶930蚊，單係燃料費用已經用咗超過11萬元，佢話來回釣魚台航程約10日，預計要40至50桶油，入多啲貨，以預備有需要時長時間「作業」。
至於船上其他物資，羅就稱主要準備食水，食物方面則冇考究，因為「靠海食海」，出海最好食海鮮。羅就又話，今次出海「捕魚」估計開支達25萬元，起行前未籌夠錢，可能不滿日本囂張侵佔釣魚台，呢幾日市民捐款畀保釣行動委員會較為熱烈，經費已籌得七七八八，再出海嘅話，不日起程無後顧之憂。
保釣行動委員會主席陳妙德話，今次出海做足準備工夫，添置新魚網、漁具花咗萬幾兩萬蚊，佢批評港府部門阻撓干預，「如果捉唔到魚，真係血本無歸」。特區壓制保釣行動，有人認為同北京落指示有關，陳妙德同八方講，今次可能係特區官員自把自為，佢話以前一傳出保釣人士想出海消息，中聯辦或中方中間人，就會主動聯絡佢哋「傾偈」，十分「關心」佢哋，勸阻意圖好明顯，今次中方卻冇動作，因此佢認為今次可能係特區政府「擦錯鞋」，錯誤揣摩上意而妨礙咗保釣大業。
保釣將全球串連
是否如此呢？八方不敢妄自推測，不過下一波保釣行動，可能更加波瀾壯闊，陳妙德指明年係釣魚台淪陷40周年，兩岸四地加上海外老保釣人士一於大串連，將成立「世界華人保釣大聯盟」，經多次商議後已有基本共識，預計年底前可正式宣佈成立。不過陳妙德話大聯盟暫時冇計劃千帆並舉出海宣示主權，初步打算會搞座談會及展覽，教育下一代釣魚台主權歷史。
mailto:[email protected]