電影《狄仁傑之通天帝國》昨晚舉行首映禮，一班演員盛裝赴會，雖然李冰冰以紅裙配200萬首飾登場，惜仍不及戲中演武則天的劉嘉玲配上1,500萬首飾般雍容華貴。昨晚有一名來自山東的fans衝上台求見偶像劉德華，擾攘後也得償所願獲簽名。
劉德華、劉嘉玲及李冰冰等一班演員，昨晚出席電影《狄仁傑之通天帝國》在銅鑼灣時代廣場露天場地舉行的首映禮。兩位女主角由戲內鬥到戲外，演武則天手下的李冰冰以一套價值200萬的手鈪配戒指登場，不過仍然不敵以華貴裝扮襯1,500萬首飾的劉嘉玲。
嘉玲爆偉仔頻受傷
嘉玲被問到梁朝偉會否捧場時，她說：「佢喺內地趕戲，我哋每日都有通電話，知佢拍呢套《一代宗師》好辛苦，成日受傷。」對於早前張曼玉失約威尼斯影展《狄》片首映，嘉玲說：「係囉，你哋又話佢嚟。」她謂二人私底下經常保持聯絡。作為後輩的冰冰表現得體，大讚嘉玲及華仔非常照顧後輩，她說：「他們很照顧我，華哥為人很幽默。」
對於近日有一名自稱劉德華fans的18歲河南學生來港，在旺角行人專用區公開求助，要求跟偶像見面及索簽名相，華仔說：「未知，要了解咗先，簽名容易，見面就未必喇。」
昨晚則有一名來自山東男fans到場，更一度衝上台希望跟偶像接觸，不過被現場保安阻止，並沒引起混亂，最後華仔也很貼心送上簽名，該名fans便心滿意足離去。華仔事後回應說：「我問佢係咪就係專誠河南嚟去到行人專用區嗰位，佢話唔係，自己喺山東嚟，都係我fans，我就同佢講叫佢自己小心。」
華仔盼票房賺過億
此外，商台昨日播出早前跟劉德華做的錄音訪問，華仔表示近日為《狄》片及演唱會宣傳，對於肯再接拍古裝片，華仔說：「之前我唔想拍古裝戲，但後尾我都接咗。我同老爺徐克講，好想幫佢拍一套賺錢過億嘅電影，攞唔攞獎冇所謂。」被問到現在可感雨過天青，暗指早前被爆秘密結婚一事，華仔說：「我唔覺係落雨，唔係大問題，係我同一班相信我嘅人，過程中再互相了解。人嘅路會有高低，家更覺佢哋可愛。」
採訪：溫敏芝 攝影：陳順禎
