六屆金像美指奚仲文是中港台大片的「鐵腳」美指，年頭才率150人搞《新少林寺》，現在又在北京拍徐克《新龍門客棧》。講電影美指，三日三夜都講不完；今期和時裝舞台有關，香港時裝設計師協會（HKFDA）下月在上海舉行「時裝．視野」展覽，奚仲文借出為陳慧琳08年演唱會設計的灰色女將軍歌衫展覽，談舞台服設計，仲文自白「未夠原創」、「唔夠叻」，中國onstage市場有自己一套，靚同美感行先。 撰文：林妙萍
翻查過去一年的紀錄，奚仲文擔任美指的電影，有《風雲2》、《十月圍城》、《刺陵》、《孔子》及《海洋天堂》等等，半客串做舞台美指，幫手《小王子》音樂劇、陳寶珠《俏柳紅梅》粵劇，多不勝數，惟獨設計歌手演唱會舞台服，只有兩個女星的名字：陳慧琳（Kelly）和宋祖英。
Kelly是合作多年老友，內地女歌唱家宋祖英合作不多，一來就是世博開幕演唱的「百鳥回巢」歌衫。奚仲文笑稱：「唔係好多人搵我做，我唔係好叻做舞台，我唔係好夠原創，有啲嘢都係有人哋嘅影子。」只有相熟明星才找他（或才找到他），下一個是張學友。
要帶藝人升格
奚仲文對近期大熱的LadyGaGa牛肉裝，他說：「得意o架，有時觀眾都係鍾意睇啲未見過嘅，『咁都得？』嘅感覺，LadyGaGa係令人期待。不過中國人嘅觀眾層面，始終係要靚，唔可以醜化，中國觀眾睇明星係要有美感，舞台上更加係啦，你睇Sammi有啲造型好特別，但都係靚嘅事，Eason可以好古怪，但有佢嘅美感同趣味，唔核突嘅。」
奚仲文不覺得這點是困局，只要歌手本身氣質想法能夠承接，仍然是有突破位，當然還要有帶領歌手/明星去突破的人，他說：「我哋係一個服務性行業，稱職嘅美指，係為一個artist做到舞台上嘅要求；成功嘅美指，就係將個artist帶領去另一個局面，好似阿叔（張叔平）咁，提升artist嘅方向、有料、有能力，畀到個星信心，有一種魅力去說服人，呢樣先算係成功。」
密集難有新意
舞台服看人，電影看故事。奚仲文直言愛做電影美指，因為有完整的故事可以慢慢發展，有背景可以依據，問到他較鍾情歷史故事還是虛構人物，他說：「各有各好玩，就算真係歷史人物，都要有少少老作，古裝時裝、真假咁間住，就最好玩。」
本來規定自己一年只做兩部片，現時已經去到一年三部，奚仲文開心又無奈：「內地電影好蓬勃，少少似90年代香港咁，啲戲多到不得了，budget又多咗，人手又多咗，係幸福嘅。不過太多呢，我又唔會諗嘢，有時做得唔夠好，都要去住先，但中途涉及好多時間、金錢呀，係唔可以返轉頭修正。」
靈感隨處而發
訪問中，奚仲文不止一次自稱不夠好，他謂會看各式各樣的雜誌、看各類型戲、觀察不同的人，但不會乖乖做紀錄。奚仲文指工作順利有靈感，全因好彩，他說：「我冇咁有紀錄，我係用腦記，啲嘢太亂唔一定摷到，有時一個機遇，一個巧合，反而會搵到（靈感），呢樣嘢都幾浪漫，率性嘅。不過真係好好彩，好急好急時，我喺街會遇到一啲嘢，諗到一啲人，好啱timing咁，又幫到我。」
靠腦記，奚仲文原來身邊連相機也沒有，不過找實質的布料、素材，他則有根：「我係返香港搵，布料、資料樣樣都最齊全。」
人物誌：入行30載曾逐奧斯卡
奚仲文，亞洲著名美術指導。82年入行，曾以《倩女幽魂》、《甜蜜蜜》等六度贏得香港電影金像獎最佳美指及服務造型獎，07年憑《滿城盡帶黃金甲》入圍奧斯卡金像獎最佳服裝設計，奪美國服裝設計師公會獎，也曾執導電影《安娜瑪德蓮娜》和《小親親》。
展現香港設計50年
香港時裝設計師協會（HKFDA）下月在上海舉行的「時裝．視野」（FashionVisionaries）展覽，以展現從60年代至今的香港時裝設計發展，超過80個本地代表單位參加，除奚仲文外，還有40多位時裝設計師、攝影師、名模、illustrator等，展出大量時裝作品、演唱會服、早年的時裝影像等。
策劃總監張潔雯小姐透露籌辦逾9個月：「我哋想呈現係更全面嘅HongKongfashion，一件衫由畫圖、設計、生產，到由模特兒着上cometolife，再通過攝影師留低影像。香港時裝其實係好早開始發展，60年代Poly已經開course、香港已經有設計師喺海外開舖，我哋希望借呢個機會畀國內外，再次認識香裝時裝。」此外，HKFDA在1987年首度舉辦「傑出衣著人士大獎」，今年也會移師上海舉行。