賭王四房大女何超盈噚日20歲生日，壽星女電咗個獅子頭新髮型，傍晚喺中環出席名牌Balenciaga活動，大會仲送咗個生日蛋糕畀佢。超盈話不會搞派對，只會返屋企同男友、家人一齊食飯慶祝，問到佢生日願望，佢話：「希望一切順利，同埋想創業做生意。」
周慧敏5分鐘賺12萬
問超盈佢男友可會乘機求婚？超盈話：「唔會！我得20歲咋，我啱啱放學，心情都幾緊張，未見到佢送乜嘢。」問佢想唔想男友快啲事業有成，可以結婚？佢就話：「佢返工好辛苦o架。」超盈透露媽咪送咗一套鑽飾畀佢，而爹哋賭王嘅禮物就要保密，但就話賭王寄語佢「開開心心」。
超盈之後去咗海港城行街，再落咗去信德同媽咪食飯。
此外，周慧敏獲大會贈價值12萬嘅限量手袋，佢只係匆匆來去5分鐘，計落真係好賺。佢之前同吳君如拍嘅《得閒炒飯》，喺坊間榮升女同志眼中頭號情人，周慧敏話受寵若驚，又話好開心，但就未試過俾女同志追求。周慧敏話：「家都係接吓廣告，做parttime藝人。」同場搶鏡嘅仲有着兩吋高踭鞋嘅潮人黃偉文（Wyman），佢話：「係LadyGaga啟發咗我，佢無時無刻都着高踭鞋。我下個禮拜去巴黎，會挑戰斗零踭。」