民政局德成局長推銷申辦2023年亞運，原來成個月前已做工夫，匯賢智庫主席葉劉淑儀噚日透露，民政局政治助理徐英偉一個月前聯絡佢，游說支持港府申辦亞運。葉劉話當時已表態一定反對，原因好簡單，豪花幾百億元搞一次性項目，條數點計都唔係好值得，加上佢認為興建國際級運動場冇逼切性，不如花錢興建屋邨或老人院，造福更多市民仲好。
葉劉企硬，唔知同民政局是但搵個政助做說客有冇關係，如果曾德成親自出馬，可能多啲偈傾。身兼港協暨奧委會會長嘅小霍噚日話，香港是否申辦亞運始終要經過諮詢決定，但身為體育界人士，梗係全力支持。