"雲格輸唔起但醒覺"
球賽如人生，機會喺眼前應該好好把握，不應左顧右盼！法比仔早段傷出，前鋒喺度係咁嘥餐士，路斯基12碼仲一飛冲天，唔一早置新特蘭於死地，到人哋反攻，即刻騰晒雞，最後落得補時剩十數秒臨尾香失兩分收場。雲格失去理智，起勢嘈場邊旁證同第4球證，有失大將風範，抵罰！唔係場場你贏晒，贏唔到亦唔好姓賴。佢老人家周中要坐上觀眾席睇盃仔對熱刺，退後啲，咪識睇闊啲想通啲咯，連盃仔都罕有咁派主力踢，同熱刺輪流攻，忍到尾派查馬克同艾沙維上陣，掃死敵出局！做人有時唔能夠左閃右避，玩走線留力打下場，踢乜都全力拼搏，能贏，起碼攞番啲氣勢。不過，大家都咁主動，點解場波加時先開入球「大」呢？
"看孔明燈睇住車仔熱倒"
之前打風落大雨，諗住中秋夜唔會見到月光，但去到友人家中作客，望向廣闊夜空，不止見到月光，更不時有人發放大熱的孔明燈，非常應景。有節目，賭波興致全消，貼了一條大冷3串4，挪威科路、紐卡素同斯肯索普勝[+1]，周中幾時都係嗱住啲下盤着數，中兩關都好有肉食，尤其係盃仔，但紐記波膽開到「客其他」就真係當圍骰好了。揸名牌幾時都係周末好啲，緊記！
"最長黃金周唔怕高追"
近數月，誰重揸零售股，真係笑逐顏開，不過短炒客肯跟風上車都仲有油水，呢個史上最長嘅黃金周，究竟勁勢可以延續幾耐，真係視乎你揸股心態。辛辛苦苦揀啱好股，放咗真係驚買唔番，我心態變了，選擇長情啲。足球場上，有時唔怕高追，因為賠率多寡視乎對賽對手，好似今天日聯「1哥」、小弟長揸「愛股」鯨魚又登場，作客勁敵清水心跳。我賭波，從不事後孔明，輸要認錯，上次貼鯨魚主W，開1:1中招，今次客W有2.67倍，再貼又唔係高追，怕乜？鹿角想再挑戰鯨魚榜首位，其他我不放在眼內；包括心跳在內，今場一定要贏先有機會再上前，故博入球「大」首選，另外客W同[+1]也可追，
"韋舒亞恨扮法比仔"
好嘢梗係多人爭，阿仙奴中場指揮官嗰位，年紀輕輕嘅韋舒亞真係膽生毛，想試吓；上場對熱刺上半場光芒乍現，今次吼正印法比仔養傷，迎西布朗，相信雲格一樣膽生毛，想畀韋舒亞試多次；不過下周中要作客柏迪遜踢歐聯，上次對熱刺又踢到加時，兵工廠可能稍為留力，又冇賠率，唔值推介，不如博曼城早場打冧車仔個冷W仲筍。
"被動冇用撐黑池主攻"
上次黑池下半場攻番車仔嘅鏡頭令我難忘，唔好諗住唔得，我學識到有時做事要主動爭取才成，我好尊重黑池荷路威，半場吞咗4蛋後認錯，多派出前鋒主攻車仔嘅態度，大敗不損戰意；今場返佢哋嘅氹仔迎布力般獲受讓，3倍W同讓球下盤不作他想，升班馬首季有威力，而佢嘅誠意，真係打動了我今次落叠。
語錄：睇波賭波嘅作用，在於你可能發掘到一啲其他人睇唔到嘅重點，唔係單睇邊個入同最終戰果。黑池今次屬於上次輸得好嗰類。