一套電影《風雲Ⅱ》令彭順、彭發兩位導演學曉一個道理。「拍戲一係做最好，一係做最差，唔好喺中間，唔係啲人提都費事提」。未入行前深信，電影當然以劇本、導演為先；入行後才知現實殘酷，沒有名演員助陣，電影的風險可以大過買股票。套戲是否開成，很多時取決演員是否有檔期。電影可悲？又未必，他們話今時今日依然有戲拍，多少都多得彭氏兄弟這個嘜頭，證明導演仍然有影響力。今趟拍回令他們起朵的鬼片《童眼》，他們坦言：「唔好再扮勁，寧願娘娘哋。」拍電影很多時也要接受現實，不再扮大師可能更勝券在握。 撰文：何永寧
蓋棺定論《風雲Ⅱ》，彭氏兄弟自言有如此成績算是一半成功，一半失敗。大佬彭順首先發言說：「大家都計錯數，唯一慶幸係冇令老闆蝕錢。」
《風雲Ⅱ》致命處是被觀眾詬病沒有故事內容，只一味賣特技，大佬語帶無奈說：「點會唔知，一打開個網人人都係話呢樣。其中最多人話鄭伊健飾演嘅聶風，點解入魔之後冇嘢講，搞到都唔知佢做緊乜。原著係咁，我哋太忠於原著跟到足，到你唔跟原著啲人一樣鬧。改編故事嘅電影永遠有解決唔完嘅難度。」
嘆明星主導市場
細佬彭發接着開腔：「有時真係唔好扮勁，反而娘娘哋仲好。」不過這一鬧，他們認為未必是壞事，彭順說：「從呢件事我哋發覺一樣嘢，喺呢行一係要做最好，唔係就做最差，千祈唔好喺中間，唔係啲人插都費事插。插你都可以知衰乜，好過衰咗都唔知，知佢哋接受唔到乜嘢，下次咪唔好再犯囉。」
他們入行前都一腔熱誠，跟很多新晉導演一樣滿身正氣，一切以劇本、手法為主，其餘都是次要，原來不是這樣一回事，彭發說：「電影梗係睇劇情講手法，原來事實未必係咁。特別係大製作，冇大明星話肯拍你套戲，都唔使諗開得成。永遠埋尾時古仔同資金齊晒，啲大牌演員一話唔接，班老細就會縮沙話『咁下次先啦！』，講真啲投資去到2、3億嘅時候邊個肯為你博。」
寧食老本拒扮勁
明星制是一直以來的積習，怪就怪可以擔大旗的演員太少，僧多粥少香港及內地情況亦如是。他們目前跟老闆的默契就是奉行1拖4政策；拍一部幫老闆賺錢的電影，換來拍四部希望嘗試的小本製作。
所以這趟重回舊路，掛正彭氏兄弟出品的鬼片《童眼》，名正言順是幫老闆搵錢的電影自然不容有失，彭順笑說：「老闆問我哋試夠未，試夠就拍番鬼片。始終鬼片賣埠全球性，你拍套《愛出貓》、《無聲火》啲片商都要估係乜戲先買。你話我哋食老本都係好事，好過一啲揸拿都冇，彭氏兄弟嘅出品可以頂到拍4部戲都唔錯。」細佬彭發亦說：「今次唔扮大師唔扮勁住，開完呢套大把機會。」
《童眼》故事大綱：一切從失蹤說起
3男3女的年輕人到泰國旅遊散心，當中包括瀕臨分手的情侶Rainie（楊丞琳飾）與樂仔（余文樂飾）、兄妹Ling（江若琳飾）與Rex和感情要好的情侶Ciwi與亞稀。豈料在泰期間遇上政變示威，機場被封，在進退兩難的局勢下，眾人被迫下榻一間殘舊酒店。其間他們遇到3個奇怪小孩及一隻小狗（亞啤飾）。一日後，樂仔、Rex及亞稀3個男仔消失得無影無蹤。3名少女在打聽他們下落時，再度遇上那班小孩，他們聲稱樂仔等人被一個女人捉走。三人大驚下報警卻不獲理會，為救樂仔等人，她們不得不硬着頭皮追查，越查下去越發覺酒店背後鮮為人知的恐怖故事。
上映日期：10月14日
