選舉當前，一隻蚊都唔可以放過。南區豪宅區有登革熱個案，為免闊佬中招，食環署以上保釣二號查老鼠嘅速度，馬上到香島道滅蚊，公民黨議員湯家驊（圖右三）都拿拿聲出動去捉蚊，佢唔係去南區，嗰處唔係佢地頭，湯大狀噚日同食環署人員一齊去將軍澳尚德邨，了解邨內蚊患情況。
議員在場，食環署人員好快手喺區內有孑孓嘅地方放置「蚊砂」滅蚊，又同食環署人員巡視邨內商場卸貨區、坑渠等地方。湯大狀要求食環署多啲巡查杜絕蚊蠅，否則居民感染登革熱就大件事。湯大狀想選超級區議員係公開秘密，佢明年參選區議會應該冇走雞，八方相信佢會更加頻密落區打烏蠅。