中日關係急凍，現正上映的電影《精武風雲．陳真》劇情就是中國高手力敵日本大師，真是湊巧。舒淇飾演的當紅舞女Kiki就在中日代表兩方遊走，除了要用貓紙記日語對白，更要唱日語歌，還被黃秋生飾演的黑幫大佬誘做八奶。
要舒淇演風情萬種的歌女不難，難在要講日語對白和唱歌，她日前接受訪問時笑說：「唱歌都可以記發音，但係要將發音記喺腦入面，再演就幾難，因為可能會講唔清楚，不過好彩呢個情況都唔係太多。」
講日語貓紙
為記發音，舒淇更自製貓紙，她說：「有一場我貼咗張貓紙喺盞燈下面，低頭望住嚟演，仲好似好有情緒，好投入咁。」提到與「宇宙最強」甄子丹及黃秋生合作，舒淇盛讚甄子丹說：「第一次同佢合作，真係好驚喜，一齊對戲已經知佢會演活陳真呢個角色，同佢以往嘅電影真係好唔同。同甄生合作真係好愉快，見到佢同佢太太嘅互動，嗰種sweet真係覺得好幸福，如果有機會同佢拍文藝片嘅話，一定好有feel。」
至於與秋生的關係，舒淇笑說：「佢係黑社會大佬，想我做佢八奶。」對於被秋生稱讚為第一美人，她笑說：「咁佢都係第一型男，佢讚我都係想我咁讚番佢之嘛！」提到於片中與內地女演員霍思燕合作，她說：「佢演得好到位，畀到好多力量同feel我，佢真係一個好有天份嘅演員。」
舒淇於片中飾演歌女，唱歌部份自然不可少，而電影原聲大碟的三首國語和一首日語歌曲，全部由她包辦，她說：「家佢哋（指電影公司）咪話好似出EP咁囉，其實好大壓力，去KTV興趣我就有，因為我覺得要好似祖兒、Sammi或者王菲咁先可以做歌手，一定要有實力，不過都幾得意呀，可以係一生中嘅好回憶。」
怕搶伊健飯碗
舒淇續說：「真歌手一定要花好多心機去學習，玩票性質都OK，所以鄭伊健演唱會搵我做嘉賓都係行行企企之嘛，如果真係搵我唱，佢冇得撈啦，哈哈哈哈！」
採訪、攝影：藍文浩