30年來，城市論壇一向被維園阿伯佔領，部份更是保皇黨先鋒。但自去年12月開始，論壇逐漸被一群維園阿哥佔領，每次按不同題目設計T恤、牌仔，最激係擲Bra、擲錢，連建制派都要暫避風頭。
記者：林佩婷
攝影：梁細權、楊錦文、王文忠、部份相片由受訪者提供
部份場地：TerminiTeaYard（25757738）
論壇爆出維園阿哥
在城市論壇，任亮憲有很多外號，如「馬草泥」、「紅衫仔」和最為人熟識的「維園阿哥」。本身為投資公司聯席董事的他，一向關心政治，遊行示威也曾參與，但比較低調行事。雖一直追看《城市論壇》，但總覺沉悶無火花，「無論台上台下只係自說自話，無可觀性，政府官員唔願去，議員講嘢千篇一律。無互動無討論，似做騷。」直至上年年尾睇睇吓《城市論壇》，聽到劉夢熊講政改，嬲到衝落現場。「其實之前因高鐵討論，已經連續幾個星期五喺立法會門外請願。呢啲事令身邊朋友有共鳴，大家都有團火燒起，覺得應該要出聲。當時正正聽到劉夢熊講到好離譜，咪衝落去。最初無諗住講到嘢，但可能我係咁望住主持，峰哥見我生面口又俾我發言，仲三次咁多。我講政制議題的論點都係發自內心，同時體會到呢個發言空間好珍貴。」
行為激進有底線
別看他訪問當日着恤衫斯斯文文，其實每星期他都穿上代表鬥志勇氣的紅衫出席，同時吸引到不少年輕人撐場，成為一股新勢力。每次對有爭議性議題他都會做足資料搜集，更會配合主題整旗仔、衣服等道具。「每次事前我哋會用facebook或Web動員宣傳，難得仲有呢個直播平台無刪剪，更要喚起更多人暢所欲言。最近30周年講言論自由，大家更通頂整蟹、做旗仔。」和台上嘉賓、台下維園阿伯舌戰，他每次都講得青筋暴現，周圍年輕人行為更激，向陳克勤擲bra，令峰哥要中斷節目；更向張宇人擲廿蚊等。雖然種種行為皆非他策劃，但他的領袖形象不期然令人入埋佢數，「老實講無論擲bra、擲錢等我事先都唔知，但我亦唔會反對佢哋咁做，大家要入我數我又唔介意。我最多同阿伯嘈，因為佢哋攻擊性強，我被動防衞。我嘅底線係唔可以有身體接觸，家仲未到失控地步，更覺人多反而秩序仲好，好似毓民擲蕉背後意義一樣。佢哋知道自己做緊咩、唔過火就OK，我食得鹹魚抵得渴，俾人話係我教嘅都唔介意。」
因論壇入政壇
自從維園阿哥出現，不論是否改變到政制民生，但就肯定改變了城市論壇的環境。收視上升、網上點擊率爆升，最高峯有幾百人圍論壇，更逼退民建聯。有人說他們是「活化」城市論壇，「自己參與其中，都算貢獻過。呢大半年的轉變大家都看到，30年來咁啱有人做某啲嘢，令到節目產生變化。維園阿伯可能覺得唔方便，但可觀性、火花明顯增加，多咗人討論、留意內容。」人怕出名豬怕肥，任生因為城市論壇，決定踏足政壇，加入社民連，但同時負面新聞接踵而來。炒樓、社民連內訌、至近日續牌事件等無一不被有心人拿來攻擊，不過他已有晒心理準備。「無疑呢啲新聞對生活、工作可能有越來越多影響，但好似毓民都有過上上落落，我會將呢啲當磨練同衝擊，以面臨日後挑戰。只要識得控制同平衡，就唔怕是非。」
擲廿蚊狗臉男
還在讀書的Danny，外表更斯文，想不到行動仲激烈。向張宇人擲廿蚊，戴狗面具追擊方剛，統統由佢即興去做。自認激進的他自言有受到任亮憲的影響，「之前已識佢，但今年3月喺動新聞見到馬草泥同陳克勤講『TryYourBest』，覺得好有趣。近年我都有參與政治上的活動，所以想去現場感受氣氛。尤其建制派講謬論，好似咩『唔開會唔投票唔等於無做嘢』，一個議員受薪唔開會話唔係無做嘢講唔通，唔通唔返學唔等於唔讀書呀？去到都有發過幾次言。直至張宇人提倡廿蚊方案，我即向張宇人提議要佢用廿蚊方案，叫佢養妻活兒，然後再講五區公投、養少隻馬可以養到N頭家，講到佢無聲出。至於那廿蚊係臨時同朋友講而擲，最後工作人員仲畀番嗰張廿蚊我，最後佢道歉就達到成個意義。」除了擲錢，Danny更有戴狗面具追擊，每次大主題會同其他成員透過MSN、fb對話探討點做，被人說激進，他自有一番道理：「有無聽過『沒有激烈的主張，連平和的改革也不行』、馬丁．路德．金講過『改變不會自動到來，而是要經過不斷的抗爭』等，平和好少成功，做啲比較激烈嘅嘢先做到效果。」
面對維園阿伯，Danny話唔會理佢哋。有時俾阿伯問候才會回敬，絕不會作出肢體衝突。他說以前阿伯獨大，言論一面倒，年輕人的出現活化了論壇，「我哋持相反意見可以平衡番，阿伯話峰哥偏幫，呢啲係傳聞啫，根本無呢件事。」即使屋企人反對，同學仔話他是敗類搞亂香港，副校長同佢提過以學業行先等，他都抱着政治人人要參與的精神，更朝毓民方向進發。「家加入社民連，將來想從政。因為政治關乎政府政事民生，連議員能否代表我都關我事。」
謝志峰：真理越辯越明
做了七年《城市論壇》監製及主持的謝志峰，每個星期由定題目、約嘉賓，再刨300-500頁資料以掌握各方面情況。鏡頭前他面對不同講者嘉賓、維園阿哥阿伯都處變不驚，還以為他主持得很輕鬆，「其實頭幾年每次出場前30分鐘還是會手心冒汗，剩番一分鐘個心會卜卜跳，近呢三、四年先穩定啲。直至兩年前第一次小中風，之後再嚟一劑血壓太高，就學識relax，家感覺係得心應手。」中風後的改變不單止是精神上放鬆，就連主持態度都有少許不同，以往主持人職責可能只是平均分配演講者發言，控制台下觀眾，似一盞紅綠燈。但他病好後態度上有少許改變，好像呂智偉說港人送錢令六四變質，他即時反問對方從何時變質？對做主持有自己見解和意見，他有一套解釋：「百分百中立、客觀係無可能出現，每星期我會揀最爆題目去講，判斷時同自己利益無關，因為選題目要公道，係提供平台俾人發言。面對一啲難控制的人，唔理係左、係右、係癲，都要尊重。佢哋講嗰刻係信自己的說話，最頂唔順嗰啲講完自己都唔信自己嘅人。好似呂智偉講六四，因我曾親身經歷，唔信佢講嘅嘢自然同佢片過。你覺得我唔啱可以鬧我，我唔會禁止唔同意見嘅人發言。至於維園阿伯講毛主席，因為佢哋對呢樣嘢深信不疑，所以要尊重。所謂真理越辯越明，講到最後一定會講出公道。」
同阿哥阿伯有偈傾
以前要控制維園阿伯，近年多了一班維園阿哥，峰哥正正處於兩代之間，支持者話年輕人的出現活化論壇，反對者如阿伯會話他們擾亂論壇秩序。但正正由於他們的出現，經常出現過激場面，有人甚至說這班人是峰哥教出來的，更指他出言偏幫，他一笑置之，「有句古老說話『越少人關注政府，社會越好』，多咗維園阿哥出現，證明社會有矛盾，香港大鑊先會咁。香港政府追唔上時代要求、貧富懸殊、偏離公平交易，先至令社會不滿。即使佢哋活化咗論壇，社會都要付出好大代價。記得維園阿哥第一次嚟，我見佢望住我，咁生面口咪俾佢講，點知又講得有紋有路，卒之俾佢講咗三次，呢個平台就係畀大家用嚟溝通。」自此年輕人長據論壇，行為越來越激，擲bra、擲錢、追擊建制派，峰哥話仍然控制得到：「擲bra真係估唔到，之後同嗰個人講確保以後唔會咁做，否則禁入論壇。至於阿伯話我偏幫，咁我哋咪偏幫咗佢哋30年！而且阿伯都曾經鬆踭，我都有問佢肯唔肯道歉？有段時間同廣播處長、副處長甚至警方開會研究，證實保安無問題；更同維園阿哥約法三章，保證唔掉嘢、唔圍人、唔干擾人身自由，家佢哋最多係舉牌，表現和平。做嘢唔可以太硬，壓制反而激發反抗意欲。城市論壇多個途徑畀佢哋，政府應該要多利用。」