今次要講嘅就係一間投行中嘅出色小店，係咩？香港哋嘅投行唔係淨係得平時嗰幾間外資行甚至大客多多卻件件散戶心態嘅中資大行嘅咩？乜咁好平時又唔見有投行幫呢間上市小店出報告嘅？何解？大行分析員背後間公司又點會俾自己隻卒出報告大大聲咁獎行家志氣滅自己威風呢！分析員明知係好公司想寫下，老細都唔會俾個報告出街啦，香港係唔會見有一家股票行出報告讚美另一家行家。
股評人就算見過公司，佢哋個個其實都係經紀一名，唔好難為叫佢哋嘥時間慢慢解構行家點樣去幫客做交易啦！
中資投行都好眼紅
上周六有留意兵分兩路加埋兩篇成3千幾字文章嘅朋友，就會知唔係馬後炮，只係就算睇咗，普通人係唔會成功破解到兩篇文章之間箇中密碼，一篇就係講呢間小店如何為中投做「deal」，另外一篇就係講鄰國哈薩克斯坦如何為中國帶來上游資源嘅投資機會，就應該唔會錯過假期前單日升咗16%嘅東英金融投資（1140）。記得今年5月初已經好詳細咁將佢點樣幫中投以筍價入股NobelOil一役講過。本報讀者若嫌睇唔係日日交「冧把」嘅文章已經悶透，就更加唔會明白點解可以有人半年之內可以為一間毫無交情嘅上市公司寫6千幾字，因為呢間投行在我心目中根本唔係家呢個價，當然更加唔係佢3月底時嘅每股資產淨值1.89元。
東英與中投公司已經唔係首次合作，今次關係更加密切係組成合作夥伴，投資於哈薩克斯坦農業行業，中投與東英分別注資1500萬美元及150萬美元予合營，點解中投肯出雞而東英只係需要出豉油，聽講唔少較東英規模更大嘅本地中資投行都好眼紅，唔明點解東英可以咁把炮泊到中投碼頭，有人更流晒口水想收購間公司，買埋人家嘅關係網，由得佢哋繼續想啦！無他，佢哋根本就無細心睇公司背景運作，以為人家只係一間跟自己一模一樣嘅普通股票行。總之，做人與經營企業，都係要堅持以專業與誠意為本。
胡孟青
獨立股評人