話咁快就過咗中秋，同男友賞月睇唔到月亮有啲掃興，好在下個禮拜五10月1日有煙花睇，想同男友訂間房睇吓煙花兼食餐好，呢幾日周圍刮下有乜筍盤。
想住得豪啲、睇煙花睇得靚啲，當然係尖東海旁一帶嘅酒店啦。洲際酒店靚靚公關Bonnie同小妹話，佢哋都有推出十．一煙花本地住宿優惠計劃，雙人入住豪華海景客房一晚，價錢$8,338，仲包埋好多優惠。好似有Bentley轎車連司機接送往返酒店，夠晒豪啦，又有祝酒香檳睇煙花。
使呢八千幾蚊最抵係可以享用到ClubInterContinental行政貴賓廊嘅設施，包括免費自助早餐、下午茶點、6點到8點嘅黃昏雞尾酒同餐前小點，同埋免費使用最近大熱嘅iPad。查詢電話27211211。
龍堡酒店$1488一晚
半島酒店則推出「細意體驗」十．一住宿優惠計劃，PRWinvy推介話，價錢$10,380，可以入住成900平方呎嘅高級海景套房一晚，另包半島早餐、寬頻上網同埋享用健身室同羅馬式泳池。
半島酒店七間食肆則舉行煙花宴，價錢成人每位$798起，酒店會安排食客到露天陽台，無遮擋欣賞十．一煙花。查詢電話29262888。
但講到抵食抵住嘅，都算係位於柯士甸道龍堡酒店推出嘅煙花滙演優惠套餐嘞，房價一晚只係$1,488，包埋雙人早、晚自助餐、龍堡廊特飲、延遲退房等優惠。個自助晚餐都唔錯，海鮮有生蠔、雪花蟹腳；開放式廚房有即叫即燒嘅原隻大蝦、羊T骨扒等。查詢23787611。
電郵：mailto:[email protected]