環保觸覺下星期三發起無冷氣夜，呼籲市民當晚7點到第二朝7點唔好開冷氣。環境局局長邱騰華同天文台長李本瀅已經同意當晚會參加，特首曾蔭權就暫時未答覆。環保觸覺主席譚凱邦話，邱局長唔使擔心好似上次試搭停車熄匙的士小巴咁要焗桑拿，根據天文台預測，當晚氣溫只有25度，對身經百戰嘅邱局長絕對冇難度。佢希望曾特首當晚喺禮賓府都熄冷氣，作為榜樣，如果特首都參加，其他高官肯定唔使叫都自動識做。
本港用喺冷氣上面嘅電力，佔總耗電量三至四成。環保觸覺嘅目標係有全港20萬個家庭及5,000名大學宿生參與無冷氣夜，唔單止可以慳番啲電費，估計仲可以減少約1,100公噸二氧化碳排放。目前已經45間機構響應，部份物業管理公司當晚亦會熄咗屋苑或大廈大堂嘅冷氣。