中秋節啱啱過，有排未到拜年時，因乜嘢事呢棟大廈俾人貼滿揮春呢？揮春點解貼埋落地呢？定係棟大廈有鬼要貼符鎮住？睇真啲，原來紅紙上面寫住「此單位已由田生地產收購」。喺強拍條例下，舊樓小業主人心惶惶，擔心自己層樓俾人強拍咗去，家咁搞法，一樣冇安樂日子過。
以前收樓，有人放蛇、放老鼠，今時今日田生收樓，貼到人哋幢樓周圍好似高街鬼屋咁，唔少網民見到都嚇咗一跳。田生「符咒」有好幾款，除咗揮春款，仲有田生標記金錢款，有時密鋪平面將一排四隻窗封晒，有啲點成五角形成個壇咁，有網民話似紅衞兵抄家。影呢輯相嘅巿民就鬧田生特登製造客觀環境，等啲業主唔想再住落去，亦搞到冇人夠膽搬入，咁就可以成功收購啦。