日本最近吹起人中之龍熱！佢除咗係PS3招牌大作，最近仲出漫畫、10月仲推日劇；香港機迷唔使得個望，同名遊戲《黑豹人中之龍新章》啱啱見街，並首度踩入PSP；據知日劇、漫畫、遊戲故事內容不盡相同，一句講晒，焗你買齊囉！
記者：符樂
《黑豹人中之龍新章》話明係新章，當然有新搞作！舊主角桐生一馬唔見咗，換嚟暴力18歲少年——右京龍也擔正，故事講佢終日惹事生非剛被踢出校，終日流連神室町做小混混，而且仲大膽到襲擊地下錢莊，更誤殺關東第一大黑幫東城會幹部——戶田直樹，後來更惹來黑白兩道追殺，並走上打黑拳度日的苦日子。
收o靚壯大陣營
拳頭交係《人》嘅精髓，新章進一步強化！玩家可自由選擇空手道、拳擊、摔角等10種以上格鬥技巧。
玩家在神室町闖蕩將會遇到現實情節，例如被不良少年欺負，只要將佢哋打敗就可收佢哋做o靚，自製原創角色。啲o靚仲可在連線對戰中使用，展開最多4人對戰。玩家要用o靚作對決，敗者需向勝者跪地求饒，更要被對方踩住個頭，極盡屈辱。
o架妹陪你飲酒
同以往系列一樣，玩得最賤都係支線小遊戲！新章支線劇情約100種，例如夜總會及賭場等統統保留，呢啲舖頭唔係齋擺做場景，仲可以走入去搵嘢玩，如療養系的按摩店，會有大姐姐幫你Massage。新章還加入打工系統，暫知有四個工種，包括漢堡、雪糕、拉麪及鋼管店，若因為買太多道具唔夠錢用，可以做吓兼職搵外快。
日劇10月開播
《黑豹人中之龍新章》漫畫，剛在9月《YoungMagazine》開始連載。但最驚喜是會被日劇化，並於10月5日起始在日本TBS、MBS播放（11集）；男主角右京龍也將由人氣男星齋藤工飾，他曾演《海猿》的田所慎一及《新宿事件》等。
Profile
《黑豹人中之龍新章》
機種：PSP
開發商：SEGA
人數：1（對戰2-4）
售價：$395（普通版）
$550（特典版）
查詢：i-Game（27253338）
