起草《基本法》時有所謂「八十九人方案」，聯署人後來創辦工商專業聯會，算係香港第一代智庫組織。工商專聯星期二晚低調慶祝成立20周年，請咗行會成員夏佳理做演講嘉賓講西九，「八十九人」之一、政務司司長唐英年都有到場，是否拉票，言人人殊。
有出席晚宴人士同八方講，當晚最矚目反而係本場刊，藍地白字印上「Discontent（不滿）」。好多人見到場刊標題咁激，即時揭開睇睇，好快睇完，發現並非工商專聯有甚麼不滿，只係佢哋調研後列出香港社會嘅四大問題，分別係青年就業、房屋問題、貧富懸殊同中小企困境。有睇過份場刊人士稱，報告內容深度不足，部份資料引用08年數據，建議亦冇乜創見，只因工商專聯立場傾向保守，忽然話社會充滿怨氣，即使只係姿態，似乎都唔係無的放矢。呢本場刊對幾位準特首候選人，唔知有乜啟發？