堂堂大男人流馬尿，仲要畀全世界見到晒，之不過我求大俠覺得「男主角」意甲羅馬嘅門將祖利奧沙治奧（圖）一啲都唔失禮，仲簡直係專業精神嘅典範！
皆因佢喺周三作客1:2輸畀布雷西亞場波，踢到補時階段同布雷西亞球員相撞後，導致右腳足踝受傷，初時仲懷疑骨裂，佢痛到喊晒都要死撐，因球隊換人名額已經用晒，令到佢要捱埋最後嗰幾分鐘，賽後仲要醫護人員抬走，好彩佢只係右足踝韌帶受傷，唔係斷腳，之不過都要唞一個月。
呢位31歲巴西門將變咗喊包後，突然人氣急升，隊友、球迷等都讚佢夠晒專業。之不過羅馬隊波成績就繼續差勁，開季4場僅錄得2和2負得2分排尾3，如果無改善，教練雲尼亞里或者要執包袱囉！