提起皇馬，掛喺球迷口邊嘅已經係寸嘴教頭摩佬、型爸爸C朗同大眼仔奧斯爾，仍然養傷嘅男人卡卡彷彿俾人遺忘。咪以為卡卡潛水咁耐係無所事事等運到，求大俠最近就聽到卡卡同佢老婆卡露蓮嘅合唱歌曲喺網上流傳，估唔到呢位球星唱到《超級巨聲》水準，直頭挑戰hit爆嘅「小巨肺」林欣彤都冇有怕。
多得《馬卡報》嘅推波助瀾，卡卡同卡露蓮嘅合唱歌《神的禮物》最近喺網絡越唱越紅，卡卡一把磁性嗓子唱出「我在神的殿找到你」、「不斷祈求有你在我身邊」呢啲咁溫馨浪漫嘅歌詞，真係冧死人。
講開首歌，原來係卡卡喺05年婚禮即席獻畀卡露蓮嘅，卡露蓮當時聽到夫君大庭廣眾唱出愛情主題曲，仲要一手包辦曲詞，梗係驚喜到喊。估唔到卡露蓮今年出CD，亦特登揀埋首歌落碟，仲搵埋卡卡合唱，純商業角度就夠晒噱頭。但唔好意思，卡露蓮今次出碟唔係為進軍樂壇或娛樂圈，近一年喺巴西四出傳道嘅佢，只係希望同大家分享至今嘅人生歷程，並宣揚愛同友誼嘅訊息。
磁性嗓子唱福音歌
除咗同卡卡合唱，卡露蓮呢隻總共有12首歌嘅CD，其中9首翻唱福音歌曲，另一首就同巴西歌手ClaudiaLeitte合唱，仲有一首就係卡露蓮寫畀囝囝Luca嘅。雖然卡露蓮因為呢隻專輯，啱啱喺一個頒獎禮拎咗歌手新人獎，佢一早講明隻碟唔係用嚟賣錢，仲將所有歌放喺個人網頁（ http://www.carolcelico.com）任人下載㖭。
講番卡卡，之前傳過國米想出年1月斟佢返意甲，不過佢呢輪好勤力喺皇馬每日做足5個半鐘頭Gym，而軍醫亦都話卡卡嘅膝傷康復進展理想，最快年尾或出年年頭復出。鬼叫卡卡心繫球場，想睇佢變「巴西巨肺」唱情歌，睇怕仲要等多幾年喇。