港台「議事論事」節目主持李鵬飛，不經不覺已經為港台做主持十年，近日成功打動佢師傅、現年93歲嘅政壇元老鍾士元出山，上鏡口述過去幾十年本地政壇歷史大事，大Sir「政壇回憶錄」有冇料爆呢？飛哥賣關子，話節目月底出街時就知。
飛哥稱大Sir退出江湖多年，多次游說先打動到大Sir，另一節目主持人李小薇透露，初時打算為大Sir錄影一小時，結果三個鐘頭先收工，辛苦晒飛哥。
台長麒叔鍾情紀錄片，投其所好，港台將製作禮賓府落成155周年特輯。在新一季節目中，暫保飯碗嘅《頭條新聞》主持吳志森同曾志豪，噚日在節目巡禮上話唔想再成為新聞人物，就算做，都寧願做娛樂版主角。
《警訊》收視贏《勁歌》
長壽節目《警訊》在亞視播出，收視撼贏咗無綫《勁歌金曲》。《警訊》主持張家寶話係對製作團隊嘅鼓勵，相信同港台用搞笑手法拍攝，又緊貼罪案新趨勢有關。