噚日世界無車日，綠色和平第二年邀請高官唔坐豪華座駕，搭公共交通工具同埋行路返工，特首煲呔曾同幾個司局長響應。
煲呔7點幾鐘由禮賓府行去附近教堂祈禱，有兩個保鑣貼身護航，另有便衣探員幫佢擔遮擋雨。煲呔以競步嘅速度，5分幾鐘就由禮賓府行到位於堅道嘅天主教聖母無原罪主教座堂，追訪嘅記者、攝記幾乎跟唔上，估唔到煲呔行得咁快，在場新聞處人員話，煲呔日日上跑步機，所以咁好氣。
綠色和平項目主任古偉牧在場恭候，送上一面印有「天天都是無車日」錦旗畀煲呔，希望佢日日都安步當車。政務司司長唐英年同黃仁龍一齊搭的士返工，環境局局長邱騰華同保安局局長李少光都係搭港鐵。年初被反高鐵人士圍，要搭高鐵離開中環嘅運輸及房屋局局長鄭汝樺，噚日搭港鐵返工，無創傷後遺症。