家啲歌星好鍾意開巡迴演唱會，吸引唔少歌迷衝出香港，飛到台灣、中國大陸睇演唱會，順便玩埋。但要自己一手一腳訂機票、酒店同演唱會門票都幾麻煩，上網訂內地演唱會門票又驚買到假飛，去到當地先買又怕售罄，要幫襯貴幾倍嘅黃牛飛。
網上旅行社真旅網（ http://www.Travelzen.com）
CEO史習德同小妹報料，佢哋都見家香港人鍾意外遊連睇演唱會嘅旅遊模式，網站決定全港首創「演唱會自由行套餐」，畀啲客上網就可以一站式訂到機票、酒店同演唱會門票。
網上會列明唔同演唱會嘅日期、時間、地點、座位表，同埋歌手宣傳片等。消費者鎖定心水後，登記成會員就可以訂購演唱會門票、機票同酒店，「演唱會門票安排喺VIP區，都係啲前排位置」。
或與偶像住同酒店
真旅網文化娛樂董事總經理葉展華話，家網站提供嘅演唱會套餐，網羅咗約八成大中華地區歌手嘅演唱會。每個月在網上大約會有6至8個演唱會售票。家開售嘅演唱會套餐包括周杰倫、羅志祥、蕭敬騰、周華健、陳綺貞，同埋喺上海舉行、劉德華同鄭秀文有份演出嘅東亞飛揚群星演唱會等。
葉展華強調，演唱會套餐提供嘅酒店，會鄰近演唱會場地，甚至係演出歌手入住嘅酒店，歌迷仲有機會喺酒店同偶像偶遇。
小妹上網試訂東亞飛揚群星演唱會套餐，網頁設計都幾清楚，有群星嘅MV任睇，跟住click入去揀酒店，一晚酒店連一張門票$2,272起，之後就可以訂機票。一條龍服務又幾方便。
電郵：mailto:[email protected]