港足水平如何，球迷心中有數，由戒毒者、露宿者組成出戰巴西「無家者世界盃」嘅香港代表隊卻有驚喜，賽程一半踢咗五場，一勝四負，贏波一場係8比6贏阿根廷，同英格蘭對賽雖然負3比11，但已有進步，因為06年首度面對英格蘭時，被大炒12比1，今年多兩球進賬，叻咗。
香港隊今年由傑志前球員梁志榮做義務教練，過去四個月密集式操練，每周兩晚，每晚兩個鐘，狀態唔錯，希望餘下賽事有多啲入球。未來三年無家者世界盃分別喺法國、墨西哥同波蘭舉行，搞呢隊波嘅社區組織協會幹事吳衞東透露，已向當局提出香港申辦2014年無家者世界盃，但未獲回覆，「賽事未試過喺亞洲舉行，如果香港申請，好有機會成功」。
吳衞東話必須獲港府支持才成事，否則民間組織冇可能孭飛，佢估計辦一次大賽要1,900萬元，同搞亞運預算比較，只係好細數目，「有成40幾個國家參加，又可顯示香港踢走貧窮決心，係一個城市嘅光榮」。