台、港官方關係升溫，財爺鬍鬚曾早前訪台，與行政院長吳敦義會面臨時告吹，可見兩地官方接觸尚待磨合。商人口袋有錢，待遇唔同啲，新地非執董、世界華商聯合促進會榮譽會長郭炳湘今日帶團到台灣，出席首屆「台浙港論壇」。
呢個論壇約有100個浙、港、台大老闆出席，香港莊士集團主席莊紹綏、大陸娃哈哈集團董事長宗慶後、世茂集團許榮茂同行，多位富豪身家總數係天文數字，闊佬起錨赴台唔係去遊埠，而係探討ECFA啟動後，兩岸三地民企合作商機，會即場簽定三方框架合作意向書。據講海基會董事長江丙坤會在論壇上致辭，吳敦義、國民黨榮譽主席連戰會請闊佬食飯。