陳志雲落難遭愛將背叛，所幸仍有好友關心，古巨基昨晚與林欣彤及吳家樂等在沙田演出《沙田月滿樂安居》節目，基仔透露與陳志雲有電話及短訊聯繫，他說：「佢心情正常，好似平時咁，冇乜差別。」可擔心志雲？他說：「件事進入咗司法程序，我唔方便講太多。」提到王喜謂要賣樓幫志雲，基仔愕然說：「我冇睇報道，但知王喜好關心Stephen（陳志雲）。」
大讚林欣彤
基仔又鼓勵同場的林欣彤，大讚她唱歌好聽，林欣彤則表示完騷後要趕回家與親人吃飯，之後再約《超級巨聲》的朋友相聚。會否約緋聞男友羅孝勇？她說：「佢喺街可能會join埋，我哋一路成班朋友一齊玩。」又謂不習慣常被狗仔隊跟蹤，更曾跟她回學校，幸好校方沒投訴，老師還為她心理輔導，她說：「同學都陪我一齊放學，嚟緊我想專心讀書，唔做咁多幕前嘢住。」
此外，黃宗澤昨日出席網站活動時談起陳志雲，他說：「我冇分o架，無黨無派，食自己。」至於志雲正替無綫處理秘密任務傳聞，他說：「我真係唔知，冇八卦過喎，希望佢平安度過啦。」同場鄭伊健談到有傳志雲為無綫與四大唱片談和解，他說：「乜嘢行業都好，唔團結就會輸，和好係應該嘅，大家都大方少少啦。」
採訪：譚倩宜、卓寶花
攝影：仇志德