自從「志雲大師」一干人被控，電視城又再風起雲湧，係時候做善事冲喜。無綫掌舵人「六嬸」方逸華噚日代表邵氏基金會，豪捐一億元畀城市大學做中秋賀禮。六嬸樂善好施本應開心，但一聽見「契仔」陳志雲個名卻似乎唔多like，充耳不聞，問而不答。
身穿白色套裝，帶粉紅色領巾嘅六嬸，噚日以邵氏基金會主席身份出席城大捐款儀式，由盛傳與大師不和嘅無綫電視製作資源總監樂易玲陪伴六嬸，八方見到樂小姐不時同六嬸咬耳仔。六嬸全程低調，連支票遞交儀式都唔肯上台，直至城大贈送一幅六叔邵逸夫油畫，六嬸先上台接受。
聞志雲唔識笑
城大送出嘅油畫畫得六叔後生又靚仔，六嬸見到心情即時唔同晒，笑得鬼咁開心，逐一同來賓握手致謝。儀式後校方有個小型酒會招呼賓客，六嬸終於開金口，食咗件台灣月餅，仲用普通話同城大校長郭位講：「真的很好吃。」
捐完錢，食完餅，六嬸在大批保安護送下離開，記者一擁而上追問志雲大師單官司，六嬸又收起笑容，冇答任何問題就走人。
邵氏基金會捐一億元，係城大創校以來最大單一捐獻，外界笑言可能因為應屆港姐亞軍張秀文係城大學生（已申請休學），六嬸先肯慷慨解囊，實情今次係由城大副監督梁乃鵬穿針引線。梁乃鵬係無綫副行政主席，今個月初同六嬸開會時，提議向城大捐款，據說六嬸諗咗10分鐘，問咗幾個問題就拍板應承。
中秋節收到一億元大禮，城大當然識做，將明年夏天落成嘅創意媒體中心以邵逸夫爵士命名，校長郭位又話，今年籌到嘅1.5億元，可撥入明年2月嘅大學配對補助金計劃，錢搵錢，見使好多。今次唔係六叔首次捐款城大，校內已有邵逸夫圖書館，雙方早有淵源，邵逸夫獎獎座設計大賽，都係由城大創意媒體學院策劃統籌。
噚日一場盛事，可惜城大校董會主席梁振英唔喺香港，不過佢好有交帶，專登拍低video向六嬸致謝，播出片段時全場人士會心微笑，咁又難怪，「司馬昭」諗緊乜，真係路人皆知。
mailto:[email protected]