唔好話小妹淨係識得飲飲食食，有時都會去睇吓名畫高檔一番。蘇富比下個月4號喺會展搞個2010年當代亞洲藝術秋季拍賣會，小妹噚日去咗見識。拍賣會有成217件拍賣品，總值估價超過1.5億。最犀利嘅就係中國當代藝術家張曉剛92年嘅作品《創世篇：一個共和國的誕生二號》（圖），估價2,100萬至2,300萬。蘇富比當代亞洲藝術部專家Jonathan話，張曉剛92年得兩幅作品，另一幅《創世篇︰一個共和國的誕生一號》之前已經畀收藏家用2,300萬投得，剩番呢幅實好搶手。
加入中國歷史元素
Jonathan話《創世篇：一個共和國的誕生二號》對佢成名作《血緣：大家庭系列》起咗承先啟後作用，成為藝術創作轉捩點。幅畫咁矜貴，小妹落足眼力睇。
畫中有個黃色BB瞓喺木箱，畀塊白布包住，前面仲有隻紅色斷掌指住本打開嘅書，但最大嘅突破係加入咗中國歷史做題材，背景係幾張1949年中共建政時嘅相。Jonathan仲話張曉剛早期作品成日用嘅斷掌、書同BB元素，後期作品已經買少見少。
另一個藝術家曾梵志94年作品《假面系列五號》，係佢《面具系列》入面最早一批作品，估價900萬至1,500萬。畫入面有兩個戴面具男人，佢哋綁住紅領巾，又着牛仔褲，代表西方文化喺90年代初滲入中國，表達當時中國人對文化轉變不安。
今次展覽仲有「慾．望」系列藝術品，包括以性為題嘅日本攝影大師荒木經惟、仆正赫等。
電郵：mailto:[email protected]