又有傳媒人搞工會，今次係加拿大《明報》，由於不滿公司賺錢時唔分享成果加人工，蝕錢時就裁員不手軟，當地員工正籌組工會開始收會員，希望運用集體談判權同資方講數。
香港《明報》亦被低氣壓籠罩，事緣《明報》新聞網本月起收費，畀咗錢嘅訂戶先可以瀏覽完全版，連《明報》記者都要畀錢先睇到。有《明報》記者質疑咁樣回水公司，疑似變相減人工，亦妨礙日常工作時搵資料，揚言打死都唔畀錢，大不了罷睇。
據講部份員工近日同管理層講數，但未有好消息。八方收到風，有《明報》員工正醞釀聯署抗議；而以資訊有價為由，堅持人人都應該要畀錢嘅高層人士，則公告天下佢自己都現兜兜畀咗兩嚿幾水做訂戶，疾呼記者應該帶頭改變「不付鈔買資訊」嘅「食免費餐」心態。八方相信公司企硬居多，皆因高層畀咗錢，推倒重來咪蝕底晒！