唔少團體一直力促政府放寬生果金離境限制，等65歲合資格長者就算唔喺香港，都有生果金收，噚日踏入夠資格攞生果金年齡嘅全國人大常委范徐麗泰都係咁話。準備同屋企人慶生日嘅范太話，支持放寬離境限制，等老人家開開心心喺鄉下養老，不過呢個係自己主觀願望，唔知會唔會實現？
除咗合資格攞生果金，范太仲可以長者身份免費去海洋公園一日遊。佢諗住搵埋另外兩老，即係佢奶奶同姑仔一齊玩番日。至於生日願望，就係希望香港人天天都happy。噚日同范太出席同一場合嘅霍震霆啱啱榮升澳博執董，透露稍後會去澳博開會兼見吓人，會諗吓做啲乜嘢會對澳門好喎。