港股噚日反覆微升6點，恒指報收21977，仲係喺22000關樓下，成交縮減至639億，不過個別股份炒賣仲係好活躍，家好友掌握大局，只係等消息炒上。
滙控（005）升破250日線之後略為整固，像健康嘅發展，地產股全線異動，睇嚟好快會再踢上。內銀股處於整固階段，內房股蠢蠢欲動，有啲股份已經起步炒。汽車股技術走勢靚，氣氛好，仲會反覆向上。
吉利C輪22929：吉利汽車（175）噚日報收3.21元，升3.5%。股價升至250日線水平，上次試呢個位係8月初，嗰次失敗咗，今次有啲唔同，大市好大機會炒高，吉利有機會借勢推向3.70元嗰頭，可以諗吓隻C輪22929。
隻輪現價37.5仙，2010年12月2日到期，行使價3元，溢價5.1%，引伸波幅45.8%，槓桿率8.6倍（有效5.7倍），正股升上3.70元，22929睇75.7仙，有望翻一番，正股跌穿3.05元就沽咗隻輪止蝕。
俊樺