曼聯「加利佬」加利尼維利講過，因為利物浦喺佢成長過程曾經太強，所以佢呢一代曼聯兵特別憎利物浦，正如家吓好多人憎曼聯一樣。我睇唔只球員咁諗，聽領隊費格遜賽前賽後嘅囂爆言論，吓吓針對紅軍，擺明同紅軍過唔去，寸王之王，當之無愧。
早喺雙紅會賽前，費Sir連已去咗意甲發展嘅賓尼迪斯都唔放過，話呢個前紅軍領隊一早應該食無情雞。好啦，曼聯前日領先兩球被扳平，最後由弗到震嘅貝碧托夫奠勝贏3:2，費Sir唔風騷至奇。佢先標榜自己有先見之明，一早已經講過貝碧托夫有料到，然後矛頭就指向利物浦：「就算被追成2:2，我都唔擔心會輸，利物浦今場波完全交唔到貨，唔係咩？」
「維迪弗爆嘜死F托」
「佢哋只係靠球證兩個錯判，一個12碼、一個自由球至識回魂。」費Sir特別針對費蘭度托利斯（F托），話人家係騙子：「佢博到12碼之後，我一直留意佢，佢擺明想博奧沙犯規出場。」以前尼曼查維迪面對F托屢出洋相，但今次維迪將對方看管得貼貼服服。「當佢（維迪）弗，對邊個球員都唔輸蝕，今日就係最好證明。」兜個圈，咪又係想寸F托冇料到。
紅軍5戰5分排尾5
回想季初真係搵鬼貼貝碧托夫爭到英超神射手，但經此一役，佢喺Skybet嘅神射手賠率係7倍，係僅次於2.75倍嘅狂人杜奧巴；至於F托已退晒熱變為9倍，對比強烈。
費Sir最後以寸爆口脗總結場波：「雲達沙全場一次撲救都冇、史高斯控制晒中場，射中柱嘅拿尼又有好大威脅，而貝碧托夫就尤其出色。當2:0嘅時候，我以為會大勝一場。」你就囂得起，難為鶴臣領軍5場得5分排尾5，好彩家陣仲叫做可以賴季初賽序難打，但再唔改善，咪以為鶴臣個位一定坐得穩呀！