2012年首次開考嘅新中學文憑試準備得如火如荼，但擔此重任嘅考評局秘書長張永明今年3月已萌去意，考評局噚日正式公佈接納佢今年12月中約滿後離任，個位由副秘書長卜俊智署任住先，直至請到新秘書長，而張永明亦會留低做受薪高級顧問。
年近退休年齡嘅張永明突然唔撈，但佢向局方講明唔係另有高就，考評局話佢想多啲時間陪屋企人。
考評局主席吳克儉話，委員會好想留佢，但唔成功，但文憑試嘅準備工作大致上咗軌道，有信心順利推行。
張永明04年由教育學院教務長轉去考評局做副秘書長，07年升正，當年學界相信，佢係教育統籌局安排入去整頓考評局嘅。