邊個話乖BB一定得人鍾意呢？呢個BB的生產過程比一個真正十月懷胎的BB還要長，要將原本一身乖巧的bB特徵摒除，變成黑碳魔鬼，令人望而生畏，有人偏說它越惡越愛！
記者：趙慧敏
攝影：楊錦文
Model：Ericko@Zmodel
鳴謝：TopMix（26927768）
改裝連料花四萬元
辣車改碳纖配件就見得多，bB都要扮惡車就少見，一手打造這架碳纖bB車的威哥直言花了不少心機。原來因為少人以bB改裝碳纖料，所以除了原料要由法國訂製回來，最重要是按組件倒模製造，且屬底面幾層碳纖設計，偷輕車身之餘亦不損其硬度，所以每件組件都花上一至兩個月時間製造。至於採用法國原料，是因為其硬度較強外，光澤亦均勻。由於製成品接近獨一無二，故此費用就稍高，以這輛bB計，改裝連材料費用便要3至4萬元。
加碳纖配件變惡相
Toyota的bB盒仔車外形向來以多變為賣點，想點改就點改，HomeFeel、暴走、卡娃兒樣樣齊，拍埋一齊足以睇到你眼花，難怪成為BoxCar之王，不過明明一架玩味十足的bB車，有車主唔走可愛路線，卻刻意要將它變成惡形惡相，聽落有啲格格不入，不過當它擺在眼前時，唔理你啱唔啱Feel，總會吸引你的目光。
這款第二代bB相比起第一代，更添流線型，減走四四正正盒仔車的元素，加入不少東瀛暴走味、低矮車身、輪廓分明的包圍，都令這一代bB增加潮味，不過無諗過以往多放在跑車上的碳纖配件，竟然在bB身上出現，而且唔係一件半件咁簡單，而是接近一半位置都改成碳纖，絕對不是一般黐膠紙貨色，屬貨真價實的碳纖組件。
車身變輕更爽快
單睇外形，就知可以改的位置都做了改裝，頭冚、頭尾包圍、頭唇、尾冚等，不過細心睇，竟然連前後燈組都裝有碳纖燈眉，再加上車頭的碳纖火燄圖案，即時令bB惡晒。眼厲的bB迷相信一睇就知，車主並無在車上增加配件，只是將原來的組件換上碳纖，咁你又會問車主咁做究竟為乜？咪就係要輕量化車身囉！
原來一身碳纖化較原來配件的重量足足輕了三分二，咁多組件加加埋埋慳足20kg，但就無損其堅固度！車身輕量化後的第一個好處是慳油，喺西九龍走一轉，本身只有約一噸重的車身變得更輕巧，起步及加速快夾爽，最緊要係周街人見到架車都回頭望一望，就是那種虛榮感已值回票價。
車主刻意保留bB的車形，由原裝配件倒模製成碳纖組件，包括車尾冚、燈眉及前後泵把角位。
