東芝TabletPC　7"雙面人

通GameShow未完，老任仲有部新NDS要發佈？咪睇見雙芒就亂估啦！佢實情係東芝librettoTabletPCW100；佢最反傳統之處，係使用兩個7"觸屏設計，飛走咗個鍵盤；咁究竟上網睇相同時玩，抑或打機聽歌一齊做？你自己話喇！

記者：陳國輝
攝影：陳盛臣
Model：Ivy@Jacso

橫直度扮電子書

會唔會因為iPad逼使Toshiba提早出招？咁又未必，但講到平板電腦配置雙TouchScreen，兼雙LED屏幕，就絕對罕見。
究竟雙芒有乜新花臣？最傳統例如扮Keyboard打字、用MousePad上網，基本無問題，但講到好玩又過癮，就梗係轉直度扮電子書啦！7"芒，約莫半張A4紙Size，如果你將W100作90°垂直，畫面上嘅圖片、文字，就會跟住轉；而雙屏幕就好似兩頁紙咁，用嚟睇書、睇漫畫，感覺幾好Feelo架！無錯，呢個Size的確好啱手形，而且WVGA畫面解像度高，但重量達到819g，始終無iPad咁輕，拎一陣仲好快手軟㖭！特別一提，虛擬鍵盤有6種變化，即除咗傳統QWERTY，仲有左右和諧式以及數字輸入式，你可能覺得選擇眾多，但真正方便易用，似乎都係傳統Keyboard適合啲！

■垂直顯示唔止可以當書睇，仲可以扮相簿㖭。

獨立性操作一般

既然係雙芒，你哋一定又好貪心咁諗，當獨立系統用得唔得先！兩個Windows？梗係無可能，但講到玩Multi-Task，例如「上身」睇片，「下身」上網，佢當然做到。留意機身右側有粒Home鍵，你可以將Windows介面作上下切換，例如先於上半屏幕打開電影，然後再切換至下半屏幕，開啟Word來打字。雖然W100配置快速SSD硬碟，但玩Multi-Task嗰陣，間中亦略欠順暢。但最感困難嘅係，當用盡雙屏幕時，若要輕觸Icon來操作電腦，因為圖像太細，好容易㩒錯，但如果勉強打開虛擬鍵盤或MousePad，又佔據咗屏幕大半，都算係兩難。